नवौं राष्ट्रिय खेलकुद प्रतियोगिता

सम्पादक
असाेज २८, २०७९

केही दिनदेखि पोखराको वातावरणमा परिवर्तन आएको छ । अविरल वर्षको कारणले यताउता गर्न जुन कठिनाई उत्पन्न भएको थियो, त्यो हटेको छ । न्यानो घाम लागेको छ । हिमाल डाँडाकाँडा प्रस्ट देखिएका छन् । नवौं राष्ट्रिय खेलकुद प्रतियोगिताको सन्दर्भमा माछापुच्छ्रे र धौलागिरि हिमालले गण्डकी प्रदेशको राजधानी पोखरा आएका आगन्तुकलाई स्वागत अभिवादन गर्न प्रतीक्षा गरे झैं पोखरा रंगशालामा आफ्नो दृष्टि केन्द्रित गरेको छ । र, खेलाडी, प्रशिक्षक, खेलप्रेमी, दर्शक एवं खेलसँग सम्बन्धित सम्पूर्ण अतिथिको हार्दिकताका साथ स्वागत गर्दैछन् । यस अवसरमा पोखरा रंगशाला आफ्नै किसिमले रंगीन भएको छ ।

पोखरामा ४ दशकपछि हुन लागेको ऐतिहासिक नवौं राष्ट्रिय खेलकुद प्रतियोगिताको भव्य उद्घाटन उपराष्ट्रपति नन्दबहादुर पुनबाट हुन गइरहेको छ । यी सबै वातावरणले खेलकुदको राजधानी हुन अग्रसर पोखराका लागि अर्को एक अवसर प्राप्त भएको हो । २०३८ सालमा काठमाडौंमा पहिलो राष्ट्रिय खेलकुद प्ररम्भ भएको थियो भने २०४० सालमा पोखरामा दोस्रो राष्ट्रिय खेलकुद प्रतियोगिता भएको थियो ।  नवौं राष्ट्रिय खेलकुद प्रतियोगिता देशका ७ वटा प्रदेशसहित, नेपाली सेना, नेपाल प्रहरी र सशस्त्र प्रहरी गरी तीन विभागीय र १ गैरआवासीय नेपाली संघ (एनआरएन) गरी कुल ११ टीम बीच प्रतिस्पर्धा हुनेछ । खेलाडीले ३६ खेलका लागि प्रतिस्पर्धा गर्नेछन् र विजयी खेलाडी र खेलाडीका टीमले ४ सय ४ स्वर्ण र सोही अनुरुपमै रजत र कास्य पदक हात पार्ने छन् । यति धेरै पदक र पुरस्कार भएको यो नवौं राष्ट्रिय खेलकुद प्रतियोगिता खेलाडी एवं खेलप्रेमीका लागि कुम्भमेला नै भएको छ । जस्तो कुम्भ मेलामा जानु, त्यहाँ नुहाएर मेलामा सहभागी हुनु पुण्य कार्य मानिन्छ, त्यस्तै खेलाडीका लागि यो राष्ट्रिय प्रतियोगितामा सहभागी हुनु आफैंमा महत्वपूर्ण अवसर हो । त्यसमा पनि यो प्रतियोगितामा पदक प्राप्त गर्नु राष्ट्रिय कीर्तिमान राख्नु हो । यस्तो पदकले धेरै खेलाडीको जीवनलाई आमूल परिवर्तन गरेको छ र अन्तर्राष्ट्रियस्तरको खेल खेल्ने ढोका खोलेको छ ।

असोज २८ देखि कात्तिक ३ सम्म संचालन हुने यो प्रतियोगितालाई प्रदेशका सबै ११ जिल्लामा आयोजना गर्ने भनिए पनि मनाङ, मुस्ताङ र लमजुङमा सम्भव भएन । अन्य जिल्लामा भने कुनै न कुनै प्रतियोगिता हुने भएको छ । आयोजकका अनुसार म्याग्दीमा महिला भलिबल र तेक्वान्दो, बागलुङमा आइटिएफ तेक्वान्दो, गोरखामा बुद्धिचाल, तनहुँमा बास्केटबल, स्याङ्जामा महिला फुटबल, पर्वतमा कराते र नवलपरासीमा कुस्ती, सापाटाक्रो प्रतियोगिता हुने भएको छ । अन्य खेलको प्रतियोगितामा पोखरामा नै हुने भएको छ । हामी पोखरामा प्रतियोगितामा सहभागी हुन आएका खेलाडी र खेलसँग सम्बन्धित सबैको हार्दिक स्वागत गर्दछौं । सहभागीहरुको पोखरा बसाई सुखद् होस् भन्ने कामना गर्दछौं । र, यो बृहत् आयोजना पूर्णरुपले सफल होस् भन्ने कामना गर्दछौं ।

Related News

सम्बन्धित समाचार

  • नयाँ सरकारसामु किसानका पुराना समस्या

    सम्पादक माघ २२, २०७९
    लोकतान्त्रिक पद्धतिमा चुनावलाई त्यसको सुन्दर पक्ष मानिन्छ । त्यो यति सुन्दर हुन्छ कि त्यसले मतदातालाई सधैं आकर्षित बनाउँछ । जनप्रतिनिधि…
  • लुम्बिनीलाई विवादको स्थल नबनाऊ

    सम्पादक माघ १९, २०७९
    भगवान् बुद्धको जन्मस्थल पवित्र लुम्बिनीको आकर्षक किसिमले विकास भइरहेको छ । लुम्बिनीमा विभिन्न बौद्ध देशहरु र बौद्ध संघसंस्थाले आ–आफ्नै देशको…
  • नयाँ राष्ट्रपतिको चर्चा

    सम्पादक माघ १८, २०७९
    नयाँ राष्ट्रपतिको चुनाव आगामी फागुन २५ गतेका दिन काठमाडौंमा हुने भएको छ । निर्वाचन आयोगले यो मितिको घोषणा गरेलगत्तै नयाँ…
  • असभामुख घिमिरेका चुनौती

    सम्पादक माघ ८, २०७९
    प्रतिनिधि सभाको गत बिहीबार भएको निर्वाचनमा एमाले स्थायी कमिटीका सदस्य देवराज घिमिरे सभामुख पदमा निर्वाचित भएका छन् । मत विभाजनबाट…
  • पृथ्वीजयन्तीमा बिदा गरियोस्

    सम्पादक पौष २२, २०७९
    पृथ्वीनारायण शाहले त्यसबेला बाइसे र चौबिसे लगायतका स–साना राज्यमा छरिएर रहेका राज्यहरुलाई एकीकृत गरेर नेपाल राष्ट्र बनाएका हुन् । उनले…

hero news full width