१. नेपाल सरकारले देशको नयाँ नक्सा सार्वजनिक गरेको छ । मन्त्रीपरिषदको सोमबारको निर्णय अनुसार भूमि व्यवस्था, सहकारी तथा गरिवी निवारण मन्त्री पद्मा अर्यालले बुधबार नयाँ नक्सा सार्वजनिक गरेकी छन् । सरकारले लिम्पियाधुरा नेपालकै भएकै आधारमा काली नदी पूर्वका गुन्जी, नाभी, कुटी लगायतका भूभाग समेटिएको नक्सा जारी गरेको हो ।
२. लम्पियाधुरा सम्मको भूभाग समेटिए पछि अब नेपालको क्षेत्रफल करिब तीनसय ३५ वर्ग किलोमिटर बढेको छ । यसअघि नेपालको भूभाग एकलाख ४७ हजार एकसय ८१ वर्गकिलोमिटर थियो । २०३२ साल अघि सम्मका नेपालका नक्सामा लिम्पियाधुरासम्मका भूभाग रहेको र त्यसपछिका नक्सामा सो क्षेत्र छुटेको भएपनि विभिन्न प्रमाणहरुलाई आधार बनाएर हाल नयाँ नक्सा जारी गरिएको सरकारले जनाएको छ ।
३. सन १८१६ मा तत्कालीन इष्ट इण्डिया कम्पनी र नेपाल सरकारबीच भएको सुगौली सन्धीमा महाकाली नदी र त्यसपूर्वका भाग नेपालको भएको उल्लेख छ । सोही अनुरुप लिम्पियाधुरासम्मको भूभाव समेटेर नयाँ नक्सा बनेको हो । त्यस क्षेत्रमा रहेको गुन्जी, नाभी, कुटी लगायतका भूभाग नयाँ नक्सामा देख्न सकिन्छ ।
४. सुगौली सन्धी अन्तर्राष्ट्रिय कानून बमोजिम मान्यता प्राप्त प्रमाण हो । त्यस अनुरुप सीमा कामय गरी नयाँ नक्सा जारी भएको छ । त्यस बाहेक पनि नेपालका जनगणनामा पहिलेदेखि नै गुञ्जी, नाभी, कुटी क्षेत्रका जनता समेटिएको र त्यहाँका जनताले नेपाल सरकारलाई कर बुझाउँदै आएका लगायतका प्रमाणहरु नेपालसँग रहेका छन् ।
५. कालापानीमा २०१८ देखि भारतले सेना पोष्ट राखेको र एकतर्फी रुपमा सडक बनाएर उद्घाटन गरेर मात्रै त्यो क्षेत्र भारतको ठहर्दैन । नेपालले प्रारम्भ देखि नै उक्त क्षेत्रहरु आफ्नो भएको दावी गर्दै भारतीय अतिक्रमणको विरोध गर्दै आएको छ । ऐतिहासिक प्रमाणहरु मौजुदा रहेको अवस्थामा भारतीय मिचाहापनले सफलता पाउन सक्दैन । आखिर उसले सत्यलाई स्वीकार्नै पर्नेछ ।