समसामयिक राजनीतिका वरिष्ठतम् व्यक्तित्व तथा नेपाली कांग्रेसका तर्फबाट राष्ट्रपतिका उम्मेदवार भएका रामचन्द्र पौडेल २५ गते सम्पन्न निर्वाचनबाट शानदार मत प्राप्त हासिल गरी गरिमामय राष्ट्रपति पदमा आसीन भए । उनले आफ्ना प्रतिद्वन्द्वी एमालेका उम्मेदवार सुवासचन्द्र नेम्वाङलाई हराएका थिए । उनी राष्ट्रपति निर्वाचित भएपश्चात् राजनीतिमा एउटा नयाँ वातावरण सुरु भएको छ । योग्य व्यक्ति योग्य स्थानमा पुगेको टिप्पणी भइरहेको छ । हिजो जस्तो राष्ट्रपति र प्रधानमन्त्रीबीच असमझदारी भई असहयोगको अवस्था नआउने अपेक्षा गरिएको छ । राष्ट्रपति पौडेललाई अनुभवले खारिएका र समस्या पर्दा विकल्प दिन सक्ने व्यक्तिका रुपमा चित्रण गरेको पाइन्छ ।

उनले ६ दशकभन्दा लामो राजनीतिक यात्रा गरेका छन् । विद्यार्थी अवस्थादेखि नै उनी राजनीतिमा सक्रिय थिए । पञ्चायतको विरोध गर्दा उनी पटक-पटक जेल जानु परेको थियो । बिपीको प्रजातान्त्रिक समाजवादबाट उनी प्रभावित थिए । अध्ययनशील स्वभावका उनी पछि आफैं समाजवादी चिन्तकका रुपमा परिचित भए । २०४८ मा पहिलो पटक गिरिजाप्रसाद कोइराला प्रधानमन्त्री भएका बखत पौडेल स्थानीय विकास मन्त्री भएका थिए भने २०५६ मा कृष्णप्रसाद भट्टराईको प्रधानमन्त्री रहँदा उपप्रधान तथा गृहमन्त्री भएका थिए । उनी पटक-पटक मन्त्री हुँदै प्रतिनिधि सभाको सभामुख पनि भए । सभामुख भएर उनले तटस्थ र निष्पक्ष भूमिका राम्ररी निर्वाह गरेका थिए । उनको त्यही भूमिकाले गर्दा सबै पार्टीहरुसँग उनको राम्रो सम्बन्ध स्थापित भएको छ र कुनै पार्टीसँग केही विषयमा असमझदारी भई समस्या आइपर्दा उनी नै वार्ता गर्न जान्थे । उनको त्यही भूमिकाले गर्दा यस पटक राष्ट्रपतिको चुनावमा १ दर्जन पार्टीहरुले उनलाई समर्थन गरेका थिए ।

उनी नयाँ र जटिल कामहरु पनि राम्ररी सम्पादन गर्दथे । त्यसै भएकाले बृहत् शान्ति सम्झौतापछिको कांग्रेस, एमाले र माओवादीको मिलिजुली सरकारमा उनले शान्ति तथा पुनर्निर्माण मन्त्रालय सम्हालेका थिए । त्यो कठिन घडीमा पनि उनले जिम्मेवारी कुशलतापूर्वक पूरा गरेका थिए । उनले गरेका काम कुरामा कतै कसैले औंला ठड्याउने अवस्था रहेन, जुन उनको कार्यगत विशेषता बनेको छ । उनी स्वच्छता र इमानदारितामा जोड दिन्छन् । नैतिकतालाई मूल मन्त्र सम्झन्छन् । उनी धार्मिक प्रकृतिका छन् र धर्ममा विश्वास गर्दछन् । अझसम्मको हिसाबले उनी सफल व्यक्ति हुन् । राष्ट्रपति भएपछि निश्चय नै भूमिका केही फेरिन्छ । चुनौतीहरु नयाँ–नयाँ रुप र रंगमा आइपर्दछन् र राजनीतिक विवादहरुले अन्योल बढाउन सक्छ । जिम्मेवारी बढ्छ । सबै पक्षलाई चित्त बुझाएर जानुपर्ने अवस्था आउँछ, जुन चुनौतीपूर्ण हुन्छ । राष्ट्रपतिले यस्ता सबै चुनौतीको सफलतापूर्वक सामना गर्न सकून्, यही हाम्रो शुभकामना छ ।