१. हिजो मंगलबार उम्मेदवारहरुले वैशाख ३१ गतेको निर्वाचनका लागि आ-आफ्नो उम्मेदवारी दर्ता गरेका छन्। उम्मेदवारको दर्ता प्रक्रिया उत्साहसाथ भएको छ। यसको साथ अब ३१ गते निर्वाचन हुन्छ कि हुँदैन भन्ने आशंका हटेको छ। निर्वाचन हुने निश्चय भएको छ।

२. हिजो एकपछि अको अन्यौल सिर्जना गर्ने वातावरण बन्दै थियो र त्यसले गर्दा चुनाव हुन्छ कि हुँदैन भन्ने शंका छाएको थियो। ती मध्ये केही बाधा अवरोध अहिले पनि छ। तर चुनाव हुनुपर्दछ भन्ने सशक्त जनमत अगाडि अन्यौल सिर्जना गर्नेहरुको काम प्रभावहीन हुँदै गएको छ।

३. चुनावप्रति मधेसी मोर्चाको दृष्टिकोण पनि सकारात्मक भएको छ। त्यसले भने अनुसार संविधान संशोधन भएको छैन। संविधान संशोधन हुन अझै केही दिन प्रतीक्षा गर्नुपर्ने भएको छ। तैपनि त्यसले लचिलो दृष्टि अपनाउनु राष्ट्रिय राजनीतिका लागि सकारात्मक कुरा भएको छ।

४. राष्ट्रिय राजनीति पार्टीरुले आ-आफ्ना उम्मेदवारहरु मार्फत उम्मेदवारी दर्ता गराएका छन्। निर्वाचन आयोगमा जति धेरै दल दर्ता भएका छन्, त्यत्ति धेरै दर्ता प्रक्रियामा आफ्नो उपस्थिति जनाएका छैनन्। केही साना दलले कतै मेयर र अध्यक्षमा त कतै सानो पदमा मात्र आफ्नो उपस्थिति देखाएका छन्।

५. यस पटक तालमेल गरेर उम्मेदवार बनाउने प्रयास निकै धेरै भए। कतिपयले केन्द्रीय स्तरमा नै तालमेल गरेर उम्मेदवारी दिएका छन्। केहीले स्थानीय स्तरमा तालमेल गरेका छन्। केही ठाउँमा बलियो उम्मेदवारको विरुद्धमा साना पार्टीरु एक भएको पनि देखिएको छ।

६. साना पार्टीरु एक हुन्छन् भने यसलाई बुझ्न सकिन्छ। तर कतै ठूला पार्टीरुले पनि त्यस्तै रणनीति बनाएका छन्। काँग्रेस बलियो भएको ठाउँमा एमाले र माओवादी मिल्ने र एमाले बलियो भएको ठाउँमा काँग्रेस र माओवादीले आपसमा तालमेल गर्न खोजेको पनि देखिएको छ।

७. चुनाव हो, चुनावमा अनेक किसिमको तालमेल हुनसक्छ। रणनीति अख्तियार गर्न सक्छ। गठबन्धन सरकारको अभ्यासले राजनीतिक पार्टीरुमा छुत र अछुतको भेदभाव हराउँदै गएको छ। कोरा सिद्धान्तभन्दा व्यवहार हेर्ने र व्यवहारवादी हुने प्रवृत्ति बढ्दो राजनीतिमा देखा परेको छ। यो प्रवृत्तिले राष्ट्रिय राजनीतिमा सकारात्मक प्रभाव पार्ने देखिएको छ। चुनाव हुन्छ भन्ने भावना जागृत भएको छ।