भदौ महिना समाप्त भएको छ । असोज महिना सुरु भएको छ । असोजको सुरुआतसँगै मौसममा परिवर्तन आएको छ । झरी बादलको मौसम हटेको छ । बाढी पहिरोको सम्भावना कम भएको छ । प्रकृति खुलेको छ । स्वच्छ सफा देखिएको छ । विगतमा अधिकांश समय बादलको घुम्टोभित्र लुकेर बसेको हिमालले घुम्टो खोलेर हेर्न थालेको छ । प्रकृतिमा अनुकूल परिवर्तन आउन थालेको प्रष्ट अनुभूत भएको छ ।
एकातिरको स्थिति यस्तो छ भने अर्कोतिर कोभिड–१९ को महामारी छ । महामारीमा खास अन्तर आएको छैन । संक्रमण बढ्दो छ दिनहुँ मानिसहरु हजारभन्दा बढी संक्रमणको सिकार भएका छन् । स्थिति अहिले पनि भयावह छ तैपनि सरकारले लकडाउन क्रमशः घटाउँदै लगेकाले स्थितिमा केही सुधार भएको हो कि जस्तो देखिएको छ । सडकमा यातायातको संख्या बढ्दै गएको छ । सहर बजारमा मानिसहरुको आवतजावत बढ्दो छ धार्मिक एवं सांस्कृतिक पर्वहरुमा पनि मानिसहरुको भिड बढ्दो छ । ती सबै हेर्दा कोभिड–१९ को महामारी घटेको हो कि जस्तो लाग्छ । महामारी नघटे पनि त्यसको डर भने घटेको छ । हिजो जुन अभावहरुको स्थिति थियो आज त्यो छैन । सरकारले कोभिड–१९ को विरुद्धमा खोपको व्यवथा गरेकोले पनि स्थितिमा त्यो अन्तर आएको हो । सरकारले खोपको आपूर्ति त गरिरहेको छ तर त्यतिले पुगेको छैन । आपूर्ति छिटो गर्नु आवश्यक छ ।
नेपालीहरुको सबैभन्दा ठूलो पर्व दसैं तिहार नजिक आएको छ । प्रकृतिले पनि त्यसको संकेत गरेको छ । मानिसहरु दसैं तिहारको जोहो मिलाउन दौड धूप सुरु गर्न थालेका छन् । लामो समयको शून्यतापछि बजारमा चहल–पहल देखिन थालेको छ । मानिसहरुमा एक किसिमको उत्साह र उमंगका लक्षण देखिएका छन् । यस किसिमले हेर्दै गएमा परिस्थति अनुकूल हुँदै गएको आभाष भएको छ । तर अरु पक्षहरु जति सुकै अनुकूल भए तापनि देशको राजनीति पक्ष कहिल्यै राम्रो हुन सकेन । यो गठबन्धको सरकारले सुरुमा केही गर्ला झंै देखिएको थियो । त्यसको चुरीफुरी एक हप्तामानै सेलाएर गयो अरु त अरु त्यो सरकार आफैंले पूर्णता पाउन सकेको छैन । सरकारले पूर्णता पाउन नसकेकोमात्र होइन गठबन्धका शीर्ष नेताहरुले सरकारले कहिले पूर्णता पाउँछ भन्नेसमेत यकीन गर्न सकेका छैनन् । तिनीहरु आफैं अलमलमा छन् । नेताहरु आलोचना गर्न पाउ चर्को चर्को स्वरमा बोल्छन् तर जब काम गर्नुपर्ने अवस्था आउँछ अनि उनीहरुको सक्षमता देखिन्छ । अहिलेसम्म दर्जनभन्दा बढी नेताहरु प्रधानमन्त्री भए कोही दोहोरिएर पनि प्रधानमन्त्री भए तर तिनीहरुले देश र समाजको लागि के दिए ? अहिले त झन् बजेट पारित गर्न नसकेर खर्च गर्न नै नसकेको अवस्थामा सरकार पुगेको छ । सोचेमा यो लज्जाजनक अवस्थामा हो । यस्तो स्थितिमा धेरै राख्नु हुँदैन । हामी छिटै अनुकूल परिस्थितिको अपेक्षा गर्दछौं ।