पोखरा, ९ भदौ । तनहुँको भिमाद नगरपालिका प्रधानाध्यापहरुले शैक्षिक समृद्ध भिमाद निर्माणका लागि प्रधानाध्यापकको भूमिका विषयक एक दिने विचार गोष्ठी सम्पन्न भएको छ ।

जनज्योति माविका प्रधानाध्यापक चन्द्रप्रसाद सुवेदीले समृद्ध भिमादका लागि प्रधानाध्यापकको भूमिका विषयमा कार्यपत्र प्रस्तुत गरेको उक्त कार्यक्रममा प्रमुख अतिथि भिमाद नगरपालिकाका नगर प्रमुख मेखबहादुर थापा रहेका थिए ।

उक्त अवसरमा शिक्षा विकास निर्देशक तिलक सिलवालले शिक्षा क्षेत्रमा लगानी गर्न नगरपालिकालाई अनुरोध गर्दै शिक्षामा गरेको लगानी खेरनजाने बताए । प्रमुख प्रशासकीय अधिकृत थमनसिंह थापाले ऐन,कानुनको अभावमा काम गर्न कठिनाइ भएको बताए । नगर पालिका शिक्षा विभागका प्रमुख उपसचिव नगेन्द्रराज पौडेलले शैक्षिक समृद्धिका लागि शैक्षिक सुशासन चाहिन्छ भन्दै एउटा व्यवस्थापकसँग नेतृत्वदायी सीप र गुण नभएसम्म संस्थाले गति लिन नसक्ने कुरा बताए ।

कार्यक्रममा नगर उपप्रमुख शारदा खनाल ,शिक्षा विकास तथा समन्वय एकाइ तनहुँका प्रमुख रमाकान्त शर्मा,प्रअ.टिकानिधि लम्साल,विद्यालय व्यवस्थापन समितिका अध्यक्ष काजिमान श्रेष्ठ,वडाध्यक्ष बुद्धिमान श्रेष्ठ लगायतले आआफ्नो धारणा राखेका थिए । स्रोतव्यक्ति केशवप्रसाद वाग्लेले सञ्चालन गरेको उक्त कार्यक्रमको अध्यक्षता जनज्योति माध्यमिक विद्यालय भिमादका प्रधानाध्यापक चन्द्रप्रसाद सुवेदीले गरेका थिए ।