खेलकुद पत्रकार मञ्च गण्डकीमा नयाँ कार्यसमिति

आदर्श समाज सम्वाददाता
फागुन २६, २०७५
nsjf gandaki_Fotor

पोखरा, २५ फागुन । नेपाल खेलकुद पत्रकार मञ्च गण्डकीमा नयाँ कार्यसमिति निर्वाचित भएको छ ।

मञ्चको पोखरामा शनिबार सम्पन्न पहिलो अधिवेशनले एकराज गिरीको अध्यक्षतामा ११ सदस्यीय नयाँ कार्यसमिति निर्वाचित गरेको हो ।

उनले अध्यक्षका प्रत्यासी दीननाथ बराललाई मात्र १ मतले पराजित गर्दै आगामी कार्यकालको लागि नेतृत्व सम्हालेका हुन् ।

४८ मत खसेकोमा विजयी गिरीले २४ र बरालले २३ मत प्राप्त गरे । १ मत बदर भएको निर्वाचन समिति सदस्य प्रकाश बरालले जानकारी दिए ।

यस्तै उपाध्यक्षमा रञ्जन अधिकारी, महासचिवमा विजय नेपाल, सचिवमा राजाराम पौडेल र कोषाध्यक्षमा शशी पौडेल निर्विरोध भए । सदस्यमा खुलातर्फ उमेश पुन, नारायण शाही ठकुरी, रोशन अधिकारी, समावेशी महिलातर्फ कविता घर्तीमगर, आदिवासी जनजातिमा गीता रानामगर र दलितमा सुशील नेपाली विजयी भए ।

आदर्श समाज दैनिकका सहायक सम्पादक समेत रहेका नेपालको महासचिवमा एकमात्र उम्मेदवारी परेको थियो । उपाध्यक्षमा मनोनयन दिएका मन क्षेत्री, सचिवमा सुरज श्रेष्ठ र कोषाध्यक्षमा प्रभू अधिकारीले अन्तिम समयमा उम्मेदवारी फिर्ता लिए । सदस्यमा ढाकामोहन बराल (गणेश) र हेमराज अधिकारीले मनोनयन फिर्ता गरे ।

रोचक के छ भने मञ्चको लगातार ३ अधिवेशनसम्म अध्यक्ष पद निर्वाचनमा मात्र १ मतअन्तर हुँदैआएको छ । यसअघि प्रेमनारायण न्यौपाने र केशव पाठक अध्यक्ष जित्दा प्रत्यासीसँग १ मतअन्तर परेको थियो ।

यसैबीच, निर्वाचित गिरीले आगामी दिनमा मञ्चलाई अझै बढाउन दत्तचित्त भै लाग्ने प्रतिबद्धता व्यक्त गरे ।

अध्यक्षका प्रत्यासी बरालले नयाँ कार्यसमितिको सफलताको कामना गर्दै सहयोग गर्ने सम्पूर्णमा आभार व्यक्त गरे ।

त्यसअघि प्रमुख अतिथि राखेप सदस्य राजेश गुरुङले अधिवेशन उद्घाटन गरेका थिए । अध्यक्षको आसनबाट मञ्च अध्यक्ष केशव पाठकले विगतको तुलनामा मञ्च बृहत् बन्दै गएको र यसले पोखरामा आयोजना गर्ने पोखरा स्पोर्टस् अवार्ड यहाँको थप चिनारी बनेको बताए । उनले कार्यकालमा सघाउने सम्पूर्णमा आभार व्यक्त गरे ।

यस्तै, नेपाल पत्रकार महासंघका केन्द्रीय सदस्य रामकृष्ण ज्ञवाली, पत्रकार महासंघ गण्डकी प्रदेश अध्यक्ष त्रिभुवन पौडेल, पत्रकार महासंघ कास्की अध्यक्ष दीपेन्द्र श्रेष्ठ लगायतले शुभकामना मन्तव्य व्यक्त गरेका थिए ।

सो अवसरमा मञ्चले वेवसाइट लञ्च गरेको छ । www.nsjfgandaki.com तथा www.nsjfgandaki.org पत्रकार महासंघ केन्द्रीय सदस्य रामकृष्ण ज्ञवालीले लञ्च गरेका हुन् ।

पोखरा स्पोर्टस् लगायत महत्वपूर्ण इभेन्टका तस्वीर, भिडियो, कार्यसमिति तथा सदस्यको नामावली, प्रेस विज्ञप्ति, सूचना, प्रतिवेदन रहने छन् । साथै कसैले खेलसम्बन्धी समाचार पोष्ट गर्न सक्ने फिचर राखिएको महासचिव रञ्जन अधिकारीले जानकारी दिए ।

मञ्च उपाध्यक्ष दीननाथ बरालले स्वागत मन्तव्य राखेको कार्यक्रममा महासचिव रञ्जन अधिकारी संचालन गरेका थिए ।

बन्दसत्रले महासचिव अधिकारी र कोषाध्यक्ष विजय नेपालको कोषाध्यक्षको प्रतिवेदन पारित गर्यो । अधिवक्ता लीलाबल्लौ न्यौपाने संयोजक रहेको निर्वाचित समिति सदस्यमा पत्रकार महासंघ कास्की अध्यक्ष दीपेन्द्र श्रेष्ठ, जिल्ला खेलकुद विकास समितिका कार्यालय प्रमुख प्रकाश बराल र अधिवक्ता विष्णु अधिकारी थिए । २०५७ सालमा स्थापित नेपाल खेलकुद पत्रकार मञ्च समन्वय समिति कास्की यस वर्ष गण्डकीको नाउँमा दर्ता भएको हो । अधिवेशनमा मञ्चका ५१ जना सदस्य प्रतिनिधि थिए ।

Related News

सम्बन्धित समाचार

  • त्रिवेणी कप विजेतालाई ५ लाख !

    आदर्श समाज सम्वाददाता मंसिर २१, २०७९
    लमजुङ । त्रिवेणी कप फुटबल प्रतियोगिताको ३० औं शृंखला तयारी थालिएको छ । त्रिवेणी क्लबद्वारा मंगलबार आयोजित पत्रकार सम्मेलनमा पुस…
  • प्रदेश खेलकुदमा अभिमुखीकरण

    आदर्श समाज सम्वाददाता मंसिर १९, २०७९
    पोखरा । प्रदेश खेलकुद परिषद गण्डकीमा एक दिने अभिमुखीकरण तालिम सम्पन्न भएको छ । प्रदेश खेलकुद परिषदका सदस्य र जिल्ला…
  • पुरुषतर्फ रोशन र महिलामा पल्लबीले जिते स्वर्ण

    आदर्श समाज सम्वाददाता मंसिर १९, २०७९
    पोखरा । लेखनाथ क्योकुसिन–कान कराते डोजोले आयोजना गरेको लेखनाथ डोजो जुनियर फुल कन्ट्रयाक्ट कराते च्याम्पियनमा पुरुष ५० केजीतर्फ रोशन गुरुङले…
  • विजेता खेलाडी र अफिसियललाई सम्मान

    आदर्श समाज सम्वाददाता मंसिर १९, २०७९
    पोखरा । प्रदेश खेलकुद परिषद गण्डकीले आइतबार पोखरामा खेलाडी, प्रशिक्षक, व्यवस्थापक तथा खेल संघलाई नगदसहित सम्मान गरेको छ । नवौं…
  • आहा ! रारा पोखरा गोल्डकप उपसमिति गठन

    आदर्श समाज सम्वाददाता मंसिर १७, २०७९
    पोखरा । २२ औं आहा ! रारा पोखरा गोल्डकप फुटबल प्रतियोगिता–२०७९ को विभिन्न उपसमिति गठन गरिएको छ ।आयोजक सहारा क्लब…

hero news full width