लमजुङ । क्ब्होलासोथार गाउँपालिकाद्वारा सञ्चालित प्रथम अध्यक्ष कप खेलकुद प्रतियोगिताको उपाधि पुरूषतर्फ वडा ४ ले हात पारेको छ । गाउँपालिकाको खेलकुद विकास समिति आयोजनामा भुजुङको पन्क्यु खेल मैदानमा भएको प्रतियोगिताको फाइनलमा वडा ३ लाई २–१ गोलअन्तरले हराउँदै उपाधि जितेको हो । उपाधिसँगै टिमले १ लाख ५० हजार रूपैयाँ, ट्रफी, मेडल र प्रमाणपत्र पाएको छ । उपविजेताले ७५ हजार रूपैयाँ, ट्रफी, मेडल र प्रमाणपत्र पाएको छ ।

यसैगरी, महिलातर्फको उपाधि वडा ६ पसगाउँले जितेको छ । वडा ४ लाई सडन डेथको शिकार बनाउँदै उपाधिसहित ५० हजार जितेको हो । उपविजेताले २५ हजार रूपैयाँ, ट्रफी, मेडल र प्रमाणपत्र पायो ।
यस्तै,पुरूष भलिबल प्रतियोगिताको उपाधि वडा १ ले हात पारेको छ । उपाधिसँगै वडा १ ले ४० हजार पायो । उपविजेता वडा ९ ले २० हजार पायो ।

म्याराथनमा वडा ६ का अशोक विक प्रथम भए । वडा ४ का भीमबहादुर गुरूङ द्वितीय तथा वडा ४ का सुजन गुरूङ तृतीय भए । दौड घलेगाँउबाट भुजुङसम्म ५ किमी दुरीमा भएको थियो । उनीहरूलाई क्रमश १०, ७, ५ रूपैयाँ, ट्रफी, मेडल र प्रमाणपत्र प्रदान गरिएको छ ।

प्रतियोगितामा गाउँपालिकाभित्रका ९ वटा वडाबाट १÷१ टिमका दरले भाग लिएको खेलकुद संयोजक गुरुङले जानकारी दिए । विजयी खेलाडीहरूलाई गाउँपालिका अध्यक्ष सूर्यप्रसाद गुरूङ, उपाध्यक्ष कमिमाया गुरूङ र गाँउपालिका युवा तथा खेलकुद विकास समिति अध्यक्ष नवराज गुरूङले संयुक्त रुपमा पुरस्कार वितरण गरे ।