पोखरा, १६ पुस। पोखरा १५ स्थित रेन्वो एकेडेमिक होम्स्का कक्षा १० का विद्यार्थीले पोखरा वृद्धाश्रमका वृद्धवृद्धालाई खाना खुवाएका छन्।

कक्षा १० का ७७ जना विद्यार्थीले वृद्धाश्रमका ७० जना वृद्धवृद्धा र १० कर्मचारीलाई वृद्धाश्रममै पुगेर आफैले खाना पकाई खुवाएको विद्यालयका अतिरिक्त क्रियाकलाप प्रमुख रुद्रप्रसाद पौडेलले जानकारी दिए।

इन्टरनेशनल स्कूल अवार्ड (आईएसए) प्रोजेक्टअन्तर्गत भएको कार्यक्रममा आश्रमका अध्यक्ष टीकाबहादुर भण्डारीले ज्येष्ठ नागरिको अवस्था तथा आश्रमबारे प्रकाश पार्दै आफ्ना घरका ज्येष्ठ नागरिकलाई सम्मान गर्नुपर्ने सुझाव विद्यार्थीलाई दिए।

विद्यालयका प्राचार्य बाबुराम बरालले ज्येष्ठ नागरिकलाई समाजले सम्मान गर्नुपर्ने तथा विद्यार्थीले ज्येष्ठ नागरिकको अवस्थाबाट जीवनमा पाठ सिक्नुपर्ने बताए। विद्यार्थीको साथमा विद्यालयका सहप्राचार्य कृष्णप्रसाद ढकाल तथा भावना थापालगायत शिक्षक सहभागी थिए।