म्याग्दी । प्रसिद्ध धार्मिकस्थल गलेश्वरधाममा करिब साढे ६ लाख रुपैयाँ भेटी संकलन भएको छ । बेनीस्थित गलेश्वरमा १ महिनामा ६ लाख ४४ हजार रुपैयाँ भेटी संकलन भएको हो । गलेश्वर शिवालयको दर्शन र पूजाआजा गर्न आएका भक्तजनबाट सो रकम संकलन भएको गलेश्वर शिवालय क्षेत्र विकास कोषका सदस्य सचिव बलबहादुर खत्रीले बताए ।

वैशाख २० देखि भक्तजनले चढाएको भेटीलाई सोमबार कोषका समिति, कर्मचारी, गलेश्वर बजारवासी, आमासमूह सशस्त्र प्रहरीको उपस्थितमा गनिएको कोषले जनाएको छ ।

भक्तजनले गलेश्वरधामको मूल मन्दिर, शिव, गणेश, लक्ष्मीनारायण मन्दिर, जलकुण्ड, होमनकुण्ड, हनुमानको मूर्तिलगायत विभिन्न स्थानमा धार्मिक भक्तजनले दर्शन गर्दा चढाएको भेटी हिसाब गरिएको हो । मन्दिरमा दर्शन गर्न आउने भक्तजनले चढाएको भेटीमार्फत् मन्दिरको कोषमा हालसम्म ३ करोड ९५ लाख रुपैयाँ संकलन भएको सदस्य सचिव खत्रीले जानकारी दिए ।

उनले भारतीय धार्मिक पर्यटकमार्फत् मन्दिरमा चढाएको भेटी १ महिनामा ३० हजार आइसी संकलन भएको बताए । बेनी नगरपालिका–६, ठूलो पहिरोस्थित पवित्र कालीगण्डकीको शिला गत वर्षको माघ १२ गते गलेश्वर मन्दिरबाट पूजाआजा गरेर लगेपछि दर्शन गर्ने भारतीय धार्मिक पर्यटक संख्यामा वृद्धि आएको छ । शिला हस्तान्तरणले गलेश्वर मन्दिरको महत्व थप बलियो बनाउँदै धार्मिक पर्यटन वृद्धिमा सहयोग पुगेको गलेश्वर शिवालय क्षेत्र विकास कोषका अध्यक्ष माधवप्रसाद रेग्मीले बताए ।