पोखरा । गण्डकी प्रदेशस्तरीय परम्परागत ठेलो प्रतियोगितामा पर्वतले उपाधिमा कब्जा जमाएको छ । पहिलो, दोस्रो र तेस्रो तिनै स्थानमा पर्वत विजयी भयो ।

प्रदेश खेलकुद परिषद गण्डकीको आयोजनामा शनिबार म्याग्दी सदरमुकाम बेनीमा भएको प्रतियोगितामा पर्वतका किरण विकले १४.०१ मिटरको दुरी ठेलो फाल्दै प्रथम भए । राजेन्द्र हमालले १३.९७ मिटरको दुरी फाल्दै दोस्रो र निशान बोहराले १२.८२ मिटर फाल्दै तेस्रो भए । उनीहरुले क्रमश: २५, १५ र १० हजार सिल्ड, मेडल र प्रमाणपत्र प्राप्त गरेको प्रतियोगिताका संयोजक योगेन्द्र शेरचनले जानकारी दिए । प्रतियोगितामा म्याग्दी, बागलुङ र पर्वतका गरी १२ खेलाडीले भाग लिएका थिए । लमजुङ र कास्कीका खेलाडी अन्तिम समयमा अनुपस्थित भए ।

विजयी खेलाडीलाई बेनी नगरपालिकाका प्रमुख सुरज केसी, प्रदेश खेलकुद परिषद गण्डकीका सदस्य चन्द्रा घले गुरुङ, जिल्ला खेलकुद विकास समिति म्याग्दी अध्यक्ष दिनेश केसी लगायतले पुरस्कार वितरण गरे । ठेलो प्रतियोगिता गण्डकी प्रदेशमा परम्पराको रुपमा खेलिँदै आएकोमा सोको संरक्षण, प्रवद्र्धन र प्रचारप्रसारका लागि आयोजना गरिएको परिषदका संयोजक शेरचनले बताए ।