पोखरा । पोखरा ११ फूलबारीका दीपक बास्तोलाको मंगलबार सेती नदीमा अन्त्येष्टि गरिएको छ । ४५ वर्षीय बास्तोला सोमबार बिहानदेखि घरबाट हराएकोमा सेती नहरमा मृत भेटिएका थिए ।

पोखरा १३ दुई कुलाको मुहानमा भेटिएको शव प्रहरीले पश्चिमाञ्चल क्षेत्रीय अस्पतालको शवगृहमा राखेकोमा सोमबार साँझमात्र शव पहिचान भएको थियो ।

लामो समय शिक्षण पेसामा रहेका उनी पछिल्लो समय जग्गा कारोबारमा संलग्न थिए । आर्थिक व्यवहार बिग्रेर आफूले यस्तो निर्णय लिएको लगायत विवरणसहितको पत्र उनको घरमा भेटिएको छ ।

फूलबारी क्लबका आजीवन सदस्य, राम मन्दिरका सदस्य रहेका उनी समाजसेवी, मिलनसार एवं मृदुभाषी व्यक्तिका रुपमा परिचित थिए । उनका श्रीमती, २ छोरा, १ छोरी तथा ३ भाइहरू छन् ।