लमजुङ । दोस्रो राइनास कप खुला फुटबल प्रतियोगिता उपाधि रोयल फ्रेन्डसिप युवा क्लब, लमजुङले जितेको छ ।

राइनास ६, धमिलिकुवास्थित गौलीटार क्षेत्रीय खेलमैदानमा भएको फाइनलमा कालिका युवा क्लब भण्डारथोक गोरखालाई २–० अन्तरले हराउँदै उपाधि जितेको हो ।

विजेता रोयलले २ लाख नगदसहित कप, मेडल र प्रमाणपत्र हात पारेको छ भने उपविजेता कालिकाले १ लाख रुपैयाँ, कप, मेडल र प्रमाणपत्र पाएको छ ।

रोयलका रोशन क्षत्री सर्वाधिक गोलकर्ता, सागर गुरुङ उत्कृष्ट खेलाडी र लिलजंग तामाङले उत्कृष्ट खेलाडीको उपाधि पाएका छन् । तिनै जनालाई जनही ५ हजारसहित प्रमाणपत्र पुरस्कार दिइएको आयोजक गौलीटार क्षेत्रीय खेल मैदान समिति अध्यक्ष किरण श्रेष्ठले बताए । हरेक खेलमा ‘म्यान अफ दि म्याच’ घोषणा गरी १/१ हजार रुपैयाँ दिइएको थियो । सेमिफाइलिस्ट मस्र्याङदी युवा क्लब गोरखा र विवाईसी भोटेओडार लमजुङलाई २०/२० हजार रुपैयाँ प्रदान गरिएको छ ।

विजयी टिम तथा खेलाडीलाई गण्डकी प्रदेश सभा सदस्य डा. टकराज गुरुङले पुरस्कार वितरण गरेका हुन् । समापनमा राइनास नगर प्रमुख खड्गवहादुर गुरुङ, उपप्रमुख पुष्पराज खनाल, प्रमुख प्रशासकीय अधिकृत गोकर्णराज सुयल, राइनास ६ का वडाध्यक्ष गोविन्दराज चिलुवाल सहित विभिन्न दलका प्रतिनिधि, क्लबका पूर्व पदाधिकारी, स्थानीय समाजसेवी लगायत रहेको आयोजक समिति सचिव सीताराम पाण्डेले जनाए । प्रतियोगितामा लमजुङ, गोरखा र तनहुँका गरी १८ टिमले भाग लिएका थिए ।