पोखरा । एलजी एसोसिएसन र नवआदर्श सामुदायिक विकास समाज आठौं संगम कप बिल स्मृति फुटबल प्रतियोगिताको फाइनल पुगेका छन् । शनिबार दिउँसो हुने फाइनलमा उपाधि विजेताले १ लाख ७५ हजार रुपैयाँ हात पार्ने प्रतियोगिता संयोजक शिव गुरूङ (माया) ले बताए ।

संगम क्लबको आयोजनामा शुक्रबार भ्याली स्पोर्टस् क्लबसँगको पहिलो सेमिफाइनलमा वरदान ताङवेको १ मात्र गोल निर्णायक बन्दा साविक विजेता एलजी एसोसिएसन उपाधि नजिक पुगेको हो ।

४७ औं मिनेटमा आशीस गुरूङको स्थानमा मैदान छिरेका ताङवेले पेनाल्टी अवसर सदुपयोग गरी दोश्रो हाफको इन्जुरी टाइमको अन्तिममा गोल गरेका हुन् । खेलमा ताङवे नै म्यान अफ दी म्याच घोषित भए ।

दोस्रो सेमिफाइनलमा नवआदर्शले सहारा क्लबलाई सडन डेथको शिकार बनाउँदै उपाधि नजिक पुगेको हो । खेलमा नवआदर्शका गोलरक्षक आशीष केसी म्यान अफ दी म्याच घोषित भए ।

यसैबीच, सेतीपुल वारि र पारीका भेट्रान्स खेलाडीबीच शनिबार बिहान ८ बजे मैत्रीपूर्ण फुटबल हुनेछ म्याच कमिस्नर खिमबहादुर गुरुङले बताए । प्रतियोगिताको मुख्य प्रायोजक सहारा हङकङ र संगम एलजी हङकङ रहेको संगम क्लब अध्यक्ष नरेन्द्रजंग गुरुङले बताए ।