पोखरा। गण्डकी बहिरा संघअन्तर्गत बहिरा युवा खेलकुद समितिको आयोजनामा शुक्रबारदेखि पोखरामा दोस्रो सेभेन ए साइड राष्ट्रिय फुटबल प्रतियोगिता सुरु भएको छ ।
पोखरा रंगशालामा भएको उद्घाटन खेलमा लुम्बिनी बहिरा संघले कास्की बहिरा संघलाई ३–० गोलले पराजित गरेको छ । दोस्रो खेलमा स्याङ्जा बहिरा संघले चितवनलाई पेनाल्टी सुटआउटमा ३–० गोलले पाखा लगाएको छ ।

तेस्रो खेलमा भने सर्लाही बहिरा संघ विजयी भयो । धरानलाई पेनाल्टी सुटआउमा ३–० ले हराउँदै सर्लाही विजयी भएको हो । यस्तै, कैलालीले बागलुङलाई र ललितपुरले काभ्रेपलाञ्चोकलाई पराजित गर्दै अघिल्लो चरणमा प्रवेश गरेका छन् ।

गण्डकी प्रदेशका नवनियुक्त सामाजिक विकास तथा स्वास्थ्य मन्त्री पञ्चराम गुरुङले प्रतियोगिता उद्घाटन गर्दै बहिराहरुले पनि खेलकुद माध्यमबाट समाजमा योगदान गर्न सक्ने बताए । १४ टिमले भाग लिएको प्रतियोगिताको फाइनल २२ माघमा हुने बहिरा संघका सचिव किसान तामाङले जनाए ।