हेमजा । टीकाराम बास्तोलाको स्मृतिमा हेमजा साहित्य प्रतिष्ठानद्वारा आयोजित वक्तृत्वकला प्रतियोगितामा गौरीशंकर बहुमुखी क्याम्पसकी मनिता श्रीपाली प्रथम भएकी छन् ।

‘नौतिक शिक्षा आजको आवश्यकता’ विषयक प्रतियोगितामा धवलागिरी बोर्डिङ स्कुलका अभिष अधिकारी द्वितीय, गौरीशंकर माविकी वीनिता भुजेल तृतीय साथै गौरीशंकर माविकै दमयन्ती तामाङ सान्त्वना हुन सफल भइन् ।

प्रतियोगिता उद्घाटन गर्दै गण्डकी प्रदेशसभा सदस्य देवका पहारीले हेमजा साहित्य प्रतिष्ठानले रचनात्मक क्रियाकलापलाई महत्व दिंदै आएको उल्लेख गर्दै विद्यार्थी जीवनमा अनुशासनको महत्व अधिक रहने औंल्याइन् ।

टीकाराम बास्तोला स्मृति कोषका संस्थापक डा. दिनेश बास्तोलाले प्रतिष्ठानले आफ्ना बुबाको स्मृतिमा प्रतियोगिता गरेकोमा खुसी व्यक्त गर्दै जुनसुकै माध्ययमबाट भए पनि विद्यार्थीले प्रतिभा प्रस्फुटन गराउन पाउनुपर्ने बताए ।

कार्यक्रम संयोजक कृष्णप्रसाद पौडेलले साहित्यले नै समाजलाई निर्देशित गर्ने औंल्याए ।

प्रतिष्ठान अध्यक्ष छन्दमणि त्रिपाठीको अध्यक्षतामा भएको उक्त प्रतियोगिता सचिव सुनिल गायकले संचालन गरेका थिए ।