पोखरा । दुर्लभ हिमचितुवाको तस्बिरबाट अन्तर्राष्ट्रिय वन्यजन्तु तथा वातावरण क्षेत्रमा चर्चित नेपालका वाइल्डलाइफ फोटोग्राफर टासी आर घलेलाई फोटोग्राफर संघ गण्डकीले सम्मान गरेको छ ।

तनहुँको ब्यास नगरपालिका तनहँुसुरमा गण्डकी फोटोग्राफर संघ गण्डकीको आयोजनामा भएको कार्यक्रममा संस्थाका अध्यक्ष दुर्गाप्रसाद पौडेलले उनलाई दोसल्ला ओढाउँदै सम्मानपत्र प्रदान गरेका हुन् । सम्मानित घलेले दुर्लभ वन्यजन्तु त्यसमाथि पनि अत्यन्त कठिन हिमाली क्षेत्रमा रहने हिउचितुवाको तस्बिर खिच्न गरेको संघर्ष र उपलब्धिबारे चर्चा गरेका थिए ।

तनहँुसुर देवस्थल सामुदायिक होमस्टेमा भएको कार्यक्रममा गण्डकी प्रदेशका विभिन्न जिल्लाका फोटोग्राफरको उपस्थिति थियो । स्थानीय व्यवस्थापन फोटोग्राफर एसोसिएसन तनहुँले गरेको कार्यक्रमको सञ्चालन संस्थाका सचिव तुलसीराम सुवेदीले गरेका थिए ।

सहभागीले तनहुँसुर ऐतिहासिक दरबार, गढी र सहिदस्मारक पार्क लगायत पुरानो हटिया बजारको बदलिंदो स्वरुपबारे पनि अवलोकन गरेका थिए । सो अवसरमा फोटोपत्रकारिता प्रशिक्षण पनि सञ्चालन भएको थियो । २ दिनसम्म चलेको कार्यक्रममा सहभागीलाई पत्रकार घनश्याम पौडेल र संघ गण्डकी अध्यक्ष दुर्गाप्रसाद पौडेलले प्रशिक्षण दिए ।