पोखरा । यती एअरको विमान दुर्घटनामा ज्यान गुमाएका गिटारिस्ट तथा संगीतकर्मी निशान्त आचार्यको मंगलबार अन्त्येष्टि गरिएको छ ।

पोखरा ११, काहुँ घर भएका आचार्य पछिल्लो समय नेपालका चर्चित गिटारिस्ट हुन् जसको लोकप्रियता युटयुब र टिकटकजस्ता इन्टरनेटका भिडियो प्लेटफर्ममा पनि उत्तिकै छ । उनको आफ्नै केसिक्स बिफोर नामक ब्यान्ड छ भने उनले यी भिडियो प्लेटफर्मबाट गिटारसम्बन्धी ट्युटोरियल सिकाउँदै आएका छन् । उनको गिटार ट्युटोरियल सिकेर पछिल्लो समय मुलुकका तन्नेरीहरु संगीततर्फ आकर्षित भइरहेका थिए ।

उनी पोखरा ११, काहुँ बतासे निवासी साहित्यकार भरत आचार्य र लक्ष्मी आचार्यका कान्छा छोरा हुन् । स्व. आचार्यको सेती नदीमा मंगलबार दाहसंस्कार गरिएको छ ।

रक गायक तथा अभिनेता रविन तामाङ, अभया सुब्बा, रक ब्यान्ड मंकी टेम्पलसहित उनका फ्यानले सामाजिक सञ्जालमा आचार्यलाई श्रद्धाञ्जली व्यक्त गरेका छन् ।
निशान्तलाई श्रद्धाञ्जली दिंदै रक गायक तामाङ लेख्छन्, ‘विमान दुर्घटनामा आफ्नो प्रियजन गुमाउनु पर्दा आज पीडा र सम्झनाको बाढी आए । आफ्ना प्रियजन गुमाउनुहुने सम्पूर्ण परिवारमा सहानुभूति छ । निशान्त आचार्य भाइ तिम्रो आत्माले शान्ति पाओस्, परिवार र साथीभाइमा गहिरो समवेदना ।’

मुलुकको चर्चित रक ब्यान्ड मंकी टेम्पलले निशान्तलाई अद्भूत गिटारिस्ट भएको जनाएको छ । केही वर्षअघि निशान्तले ‘सँगै बाँचौं न’ बोलको फिंगर स्टाइल गीत रिलिज गरेको जनाउँदै ब्यान्डले सुरक्षा लापरवाहीको कारण उनको निधन भएको जनाएको छ ।