पोखरा । नेपाल मगर संघ, कास्कीले माघे संक्रान्ति पर्वको अवसरमा आयोजना गरेको अन्तर एकाइ ब्याडमिन्टन प्रतियोगिताको उपाधि रामबजार, ढुंगेपाटन, गगनगौंडा र नमुना एकाइ समितिले जितेका छन् ।

बिहीबार र शुक्रबार विभिन्न उमेर समूहमा भएको प्रतियोगितामा युवातर्फ रामबजार, प्रौढतर्फ ढुंगेपाटन, महिलातर्फ गगनगौंडा र १७ वर्ष मुनिको छात्रछात्रातर्फको उपाधि नमुना एकाइ समिति, चाउथेले जित्न सफल भएको हो । बिजेताले नगद पुरस्कार, मेडल, ट्रफी र प्रमाणपत्र प्राप्त गरेका छन् ।

जसमा उपाधि जित्नेहरूमा युवातर्फ रामबजार एकाइका वीरबहादुर आले र डोलराज आले प्रथम, सैनिकबस्ती एकाइका विश्वास पुन र ओम थापा द्वितीय, दीप बगर एकाइका पूर्णबहादुर राना र टुकबहादुर पुन तथा सैनिकबस्ती एकाइका खडक पुन र बलबहादुर श्रीस तृतीय भएका छन् । त्यसैगरी, प्रौढतर्फ ढुंगेपाटन एकाइका क्या. भक्तबहादुर पुन र क्या. कृष्णबहादुर पुन प्रथम, हेम्जा एकाइका ढकबहादुर पुन र प्रकाश थापा द्वितीय, बुढीबजार एकाइका क्या. भीमबहादुर थापा र सु. रेशम थापा तथा ढुंगेपाटन एकाइका सु. भीमबहादुर पुन र सु. सकबहादुर पुन तृतीय भएका छन् ।

त्यस्तै, महिलातर्फ गगनगौंडा एकाइका यमकुमारी तिलिजा र अस्मिता पुन प्रथम, ढुंगेपाटन एकाइका मीनु पुन र पुनम पुन द्वितीय, रामबजार एकाइका सुधा थापा र मनु राना तथा रामबजार एकाइकै शान्ति राना र शर्मिला थापा तृतीय भएका छन् । उता, १७ वर्षभन्दा मुनिको छात्रतर्फ नमुना एकाइका अमृत थापा प्रथम, नमुना एकाइकै रोहित श्रीस द्वितीय र नमुना एकाइका देविन फगामी तृतीय भएका छन् । छात्रातर्फ नमुना एकाइका रक्षा फगामी प्रथम, कदममार्ग एकाइका सोनिका थापा द्वितीय, नमुना एकाइका सम्झना रेगामी र अमृता दर्लामी तृतीय भएका छन् ।

जसमा युवातर्फ २९ टिम, प्रौढतर्फ ८ टिम, महिलातर्फ ७ टिम, छात्रतर्फ ७ टिम र छात्रातर्फ ६ टिम प्रतियोगितामा भाग लिएका थिए । प्रतियोगिताको उद्घाटन नेपाल मगर संघ, कास्कीका संस्थापक उपाध्यक्ष इन्द्रबहादुर गर्बुजामगरले गर्नुभएको थियो ।

कार्यक्रममा नेपाल मगर संघका केन्द्रीय सहकोषाध्यक्ष पूर्णबहादुर रानामगर, जिल्ला खेलकुद विकास समिति, कास्कीका कार्यालय प्रमुख डीबी नेपाली, नेपाल मगर संघ, कास्कीका अध्यक्ष संगीता पुनमगर, उपाध्यक्ष बुद्धिमाया थापामगर र सचिव रामबहादुर थापामगरले शुभकामना मन्तव्य व्यक्त गर्नुभएको थियो ।