पोखरा । स्पेनिस फुटबल क्लब काथेरेन्यो सिपी अहिले नेपाल भ्रमणमा छ । स्पेनको बी डिभिजन क्बल काथेरेन्योमा विश्वकप खेलिसकेका तथा लालिगामा खेलिसकेका खेलाडी छन् । खेल जीवनबाट सन्यास घोषणा गरेर खेल क्षेत्रकै विभिन्न तहमा रहेका खेलाडीको बाहुल्यता छ, काथेरेन्योमा ।

सोही क्लबले बुधबार गण्डकी ११ सँग पोखरा रंगशालामा मैत्रीपूर्ण खेल खेल्यो । खेलमा विश्वकप खेलिसकेका ५९ वर्षका स्पेनीस खेलाडीसँग गण्डकी प्रदेशका युवा तथा खेलकुद मन्त्री राजीव गुरुङदेखि नेपालका पूर्व कप्तान अनिल गुरुङसम्म खेलेका थिए । कास्की जिल्ला फुटबल संघसँगको समन्वयमा लुम्बिनी गार्डेन फाउन्डेसनले आयोजनामा भएको खेलमा स्थानीय टोलीको कप्तानी नेपाली राष्ट्रिय फुटबल टोलीका पूर्व कप्तान अनिल गुरुङले गरेका थिए ।

पोखरा खेलेर काठमाडौं खेल्न जाने तयारीमा रहेको काथेरेन्योले गण्डकी एघारलाई ३–० ले पराजित गरेको हो । ‘शान्तिका लागि फुटबल’ नाराका साथ दुई मैत्रीपूर्ण खेल खेल्न नेपाल आएको काथेरेन्योले सुखद् सुरुवात गरेको हो । काथेरेन्योको जितमा कार्मेलो मोरा, मिगुएल एन्जल कारिलेरो गोन्जालेज र बर्मुले गोल गरेका हुन् ।

खेलको २३औं मिनेटमा कार्मेलो मोराले गोल गर्दै स्पेनिस टोलीलाई अग्रता दिलाए । कार्मेलोले ‘सिक्स याड बक्स’बाट पहिलो बारमा कार्मेलो मोराले गोल गरेका थिए । कार्मेलोको प्रहार गोलरक्षक दीप कार्कीले बचाउन सकेनन् । २९ औं मिनेटमा मिगुएल एन्जल कारिलेरो गोन्जालेजले गोल गर्दै अग्रता २–० को बनाए । गोन्जालोले पेड्रोको ब्याकपासलाई सदुपयोग गरेका थिए । खेलको ८९ औं मिनेटमा बर्मुले तेस्रो गोल गरे । एल कौनीको कर्नर बल रोक्न जाँदा गोलकिपर राजाबाबु गुरुङले बल नियन्त्रण गुमाए । त्यही मौकाको फाइदा उठाउँदै क्यासेरेनोका बर्मुले ट्याप इन गोल गरे । अब, टोलीले बिहीबार त्रिपुरेश्वरस्थित दशरथ रंगशालामा काठमाडौं एघारसँग खेल्नेछ ।
खेलपछि कोसेरेन्यो टिमका म्यानेजरले नेपाली टिमको प्रशंसा गरे । नेपाली टिम आफूले सोंचेको जस्तो कमजोर नरहेको प्रतिक्रिया दिए । ‘दुवै टिम निकै प्रतिस्पर्धी थिए । दुवैले राम्रो खेले,’ उनले भने, ‘हारजीतको खेल थिएन समग्रमा नेपाली टिमले डिफेन्सलाई ध्यान दिएर अगाडिसम्म राम्रो खेले ।’ नेपाली टिमको राम्रो पक्ष भनको फास्ट गेम रहेको उनले बताए । नेपालीले एअर बल कन्ट्रोल सुधार्नुपर्ने उनले सुझाव दिए ।

यस्तै स्पेनका खेलाडी रुबेनले प्राकृतिक रुपमा सुन्दर ठाउँ नेपाल आएर हिमालको फेदमा फुटबल खेल्दा निकै राम्रो लागेको बताए । अब नेपाल खेल्नका लागि मात्र नभएर घुम्नका लागि पनि आउने उनको भनाई थियो ।

गण्डकी ११ टिमका कप्तान अनिल गुरुङले मैत्रीपूर्ण खेल सिकाइको माध्यम बताए । विश्वकप खेलीसकेका खेलाडीहरु सँग आफू लगायत नयाँ युवा खेलाडीले खेल्दा अनुभव बटुल्ने मौका मिलेको उनको भनाई थियो । यस खेलले खेलाडीहरुले अनुभव लिनुका साथै पोखराको पर्यटन प्रवद्र्धनमा टेवा पुग्ने उनले बताए ।

नेपालमा दुई मैत्रीपूर्ण खेल खेल्नका लागि काथेरेन्योको ५० सदस्यीय टोली मंगलबार आइपुगेको थियो । मंगलबार बिहान कतार एयरवेजको विमानबाट काठमाडौं आइपुग्नेवित्तिकै विमानस्थलबाटै टोली आन्तरिक उडानमार्फत पोखरा आएर खेलेको हो । आगामी जनवरीमा स्पेनिस कोडा डेल रेको अन्तिम ३२ अन्तर्गतको खेलमा रियाल मड्रिडसँग प्रतिस्पर्धा गर्ने तयारीमा रहेको स्पेनिस टोलीले भोली बिहीबार काठमाडौंको दशरथ रंगशालामा काठमाडौं ११ सँग दोस्रो मैत्रीपूर्ण खेल खेल्नेछ ।