पोखरा । कास्की जिल्ला टेनिस संघको आयोजनामा १९ औं माछापुच्छ्रे पोखरा ओपन तथा भेट्रान्स टेनिस प्रतियोगिता हुने भएको छ । माछापुच्छ्रे बैंक मुख्य प्रायोजनमा पुस ११ देखि १५ सम्म पोखरा रंगशालाको टेनिस कोर्टमा सो प्रतियोगिता सञ्चालन हुन लागेको हो ।

यो प्रतियोगितामा अहिलेसम्मकै ठूलो संख्यामा खेलाडीको सहभागिता रहने कास्की टेनिस संघ उपाध्यक्ष नवीन चालिसे पत्रकार सम्मेलनमा जनाए । भारत, बेलायत र भुटानबाट समेत सहभागी आउने उनले बताए । सहभागीमध्ये ५७ जना पोखराका छन् भने ९३ जना पोखराबाहिरबाट छन् ।

प्रतियोगितामा पुरस्कार राशीमा ७ लाख ४० हजार खर्च हुने आयोजकले जनाएको छ

प्रतियोगिताअन्तर्गत मेन्स तथा वुमन्सका सिंगल्स र डबल्स तथा ३५, ४५, ५५, ६५ वर्ष माथि गरी विभिन्न उमेर समूहमा १२ इभेन्टमा प्रतिस्पर्धा हुनेछ ।

ओपन मेन्स तथा वुमन्स सिंगल्सतर्फका विजेताले जनही ८० हजार र उपविजेताले ४० हजार, डबल्सतर्फ विजेताले ३० हजार र उपविजेताले १५ हजार साथमा मेडल तथा प्रमाणपत्र प्राप्त गर्ने छन् ।

३५ वर्षमाथि भेट्रान्स सिंगल्सतर्फको विजेताले ६० हजार, उपविजेताले ३० हजार, सेमिफाइनालिस्टले १० हजारसहित पदक प्राप्त गर्ने छन् ।

डबल्सतर्फ विजेताले २० हजार, उपविजेताले १० हजारसहित ट्रफीसँगै सेमिफाइनालिस्टले १० हजार साथमा मेडल तथा प्रमाणपत्र प्राप्त गर्ने छन् । ४५ वर्षभन्दा माथिको सिंगल्स विजेताले ४० हजार, उपविजेताले २० हजार र सेमिमफाइनालिस्टले १० हजार साथमा ट्रफी मेडल र प्रमाणपत्र पाउने छन् । सोही स्पर्धाको डबल्सतर्फ विजेताले २० हजार, उपविजेताले १० हजार तथा सेमिफाइनालिस्टले १० हजारसहित मेडल र प्रमाणपत्र प्राप्त गर्ने छन् ।

५५ वर्षमाथिको सिंगल्सतर्फ विजेताले ३० हजार, उपविजेताले १५ हजार, सेमिफाइनालिष्टले जनही १० हजार पाउने छन् भने डबल्सतर्फ २० हजार, उपविजेताले नगद १० हजार र सेमीफाइनालिष्टले जनही नगद १० हजारका साथमा ट्रफी, मेडल र प्रमाणपत्र प्राप्त गर्नेछन् ।

प्रतियोगितामा ६५ वर्ष माथिको सिंगल्सतर्फ विजेताले १५ हजार, उपविजेताले ७ हजार ५ सय तथा सेमिफाइनालिस्टले जनही २ हजार ५ सयसहित ट्रफी, मेडल र प्रमाणपत्र प्राप्त गर्ने छन् ।

प्रतियोगिताको लागि करिब १६ लाख ५० हजार खर्च हुने कास्की टेनिस संघका कोषाध्यक्ष अनुज बास्तोलाले बताए । प्रतियोगितामा पुरस्कार राशीमा ७ लाख ४० हजार खर्च हुने उनको भनाइ छ । माछापुच्छ«े बैंकले मुख्य प्रायोजन वापत ५ लाख उपलव्ध गराउने भएको छ ।

कास्की टेनिसका संस्थापक अध्यक्ष तथा नेपाल टेनिस संघका केन्द्रीय उपाध्यक्ष विनोद कायस्थले माछापुच्छ्रे टेनिसले पोखराको टेनिस खेलको विकासमा अहम भूमिका खेलेको बताए ।