पोखरा । गोलकिपर लिभाकोभिच नायक बन्दा क्रोयसिया विश्वकपको सेमिफाइनल प्रवेश गरेको छ । पाँच पटकको उपाधि विजेता ब्राजिललाई टाइब्रेकरमा ४–२ गोलअन्तरले हराउँदै क्रोयसिया अन्तिम ४ मा प्रवेश गरेको हो ।

शुक्रबार राति कतारको एजुकेसन सिटी स्टेडियममा ११७ औं मिनेटमा बराबरी खेलेर क्रोयसियाले अन्ततः पेनाल्टी सुटआउटमा ब्राजिलको छैटौं उपाधि जित्ने सपनामा चकनाचुर पारेको हो । हारपछि ब्राजिल घर फर्किन बाध्य भएको छ ।

अब क्रोएसियाले अर्जेन्टिना र नेदरल्याण्डसबीच हुने दोस्रो क्वाटरफाइनलको विजेतासँग फाइनल प्रवेशका लागि प्रतिस्पर्धा गर्ने छ। यसअघि क्रोएसियाले अन्तिम १६ को खेलमा जापानलाई पेनाल्टी सुट आउटमै हराएको थियो ।

क्रोयसिया कीपरले ब्राजिलका रोड्रिगोको प्रहार बचाएका थिए भने माक्र्विन्होसको प्रहार पोस्टमा लाग्न पुगेको थियो । क्रोयसिका लागि पेनाल्टी प्रहार गरेका निकोला भ्लासिक, लोभरो माजेर, लुका मोडरिच, मिस्लाभ ओर्सिस सबैले गोल गरेका थिए ।

निर्धारित समयमा गोलरहित बराबरी भएको थियो । अतिरिक्त समयको पहिलो हाफको इन्जुरी टाइममा ब्राजिलका लागि नेमारले गोल गरेका थिए । ब्राजिलका लागि सर्वाधिक ७७ गोल गर्ने पेलेको कीर्तिमानी समेत उनले बराबरी गर्न सके । तर ब्राजिल अग्रता कायम राख्न सकेन ।

खेलको ११७ औं मिनेटमा क्रोयसियाका लागि वैकल्पिक खेलाडीको रुपमा मैदान छिरेका पेटकोभिचले बराबरी खेलेका हुन् ।