पोखरा । मदरल्याण्ड माविमा कक्षा ११ र १२ पढ्ने विद्यार्थीका अभिभावक र शिक्षकबीच सोमबार अन्तक्र्रिया भएको छ । बिहान र दिउँसो गरी २ दिनसम्म भएको कार्यक्रममा विद्यालय व्यवस्थापन समिति अध्यक्ष एवं शैक्षिक प्रशासक प्रेमनारायण पोख्रेलले सहजीकरण गरेका थिए ।

उनले जीवननोपयोगी सीपका लागि पढाइबाहेक घरका आफ्ना काम, समाचार सुन्ने र पढ्ने, भाषाको अध्ययन गर्ने, संस्कार सिक्ने, समयको महŒव बुझ्ने र समयमा काम गर्ने कुरामा बाबुनानीलाई लगाउनुपर्ने विषयमा जोड दिए । निरन्तर व्यायामका साथै परिवारका सबै सदस्य एकै ठाउँमा जम्मा भएर दैनिक केही समय कुराकानी गर्ने बानी बसाल्नाले अहिलेका विद्यार्थी तथा बाबुनानीमा अभिभावकसँग आफ्ना कुरा खोल्ने स्वभावको विकास हुने उनले बताए ।

अभिभावकमध्ये लक्ष्मी न्यौपाने, कृष्ण केसी, ओमबहादुर कार्की, शिवराज आचार्य लगायतले बेलाबेलामा विद्यार्थीलाई अभिभावक, शिक्षक र विद्यालयले अभिप्रेरित परामर्श गर्नुपर्ने विषयमा जोड दिए ।

अभिभावकका जिज्ञासा मेट्दै विद्यालयका निर्देशक त्रिभुवन शर्मा र प्राचार्य नारायण बरालले विद्यार्थीमा अद्भूत प्रतिभा रहेकाले उनीहरूको प्रतिभा पहिचान गरी प्रस्फुटनमा सहयोग गर्ने कार्यमा विद्यालयले जोड दिएको बताए । साथै अबको शिक्षा सहकार्यमा आधारित हुनुपर्ने, शिक्षक, विद्यार्थी र अभिभावकबिचको घनिष्ट सम्बन्धबाट मात्र शैक्षिक उद्देश्य पूरा गर्न सकिने धारणा राखे । यसका साथै अबको जनशक्तिको प्रतिस्पर्धा केबल राष्ट्रभित्र मात्र नभई अन्तर्राष्ट्रिय जगत्मा पनि हुने भएकाले विद्यार्थी सैद्धान्तिक पढाइका साथ जीवनोपयोगी सीपमा पनि अगाडि बढ्नुपर्ने विचार व्यक्त गरे ।

प्लस टु इन्चार्ज नारायण आचार्यले कार्यक्रम समापन गर्दै उच्च शिक्षाका लागि बलियो आधार तयार गर्ने कक्षा ११ र १२ को बोर्ड परीक्षामा राष्ट्रिय परीक्षा बोर्डले पनि अलि कसिलो बनाएकाले विद्यार्थीको उत्तम नतिजाका लागि सबै लाग्नुपर्ने कुरा व्यक्त गरे । प्लस टु विज्ञान र व्यवस्थापन समूहका संयोजकद्वय लोकबहादुर गुरुङ र इन्द्रप्रसाद पौडेलले कार्यक्रम संचालन गरेको होमनाथ भट्टराईले जनाए ।