पोखरा, १ असोज । भद्रकाली बहुमुखी क्याम्पस, पोखरा–१३ को शनिबार १३ औं वार्षिक साधारणसभा तथा चौंथो अधिवेशनबाट माधवप्रसाद सिग्देल संचालक समिति अध्यक्ष निर्वाचित भएका छन् ।
सदस्यमा जयप्रसाद सापकोटा, शोभाकान्त सिग्देल, विष्णु कार्की, बलराम बराल, भीमप्रसाद न्यौपाने र प्रदीपकुमार लम्साल चयन भए ।

क्याम्पस संचालक समितिका संस्थापक अध्यक्ष विश्वप्रकाश सिग्देलले साधारणसभा उद्घाटन गर्दै क्याम्पसका प्राध्यापकको सिनेटरमा रुची बढेकोले सबैको अपनत्व बढ्दै गएकोमा प्रशंसा गरे । गुणात्मक शिक्षाको लागि सदैव आफू तयार रहेको उनले भनाइ थियो ।

पोखरा १३ का वडाध्यक्ष किरण बरालले आफ्नो कार्यकालभित्र जसरी पनि क्याम्पसलाई जग्गा खोजी भौतिक निर्माणको सुरुवात गर्ने वचनबद्धता व्यक्त गरे । दिनरात क्याम्पसलाई जग्गा खोज्न नापिदेखि मालपोत कार्यालयमा सम्पर्क भइरहेको उनले बताए ।

क्याम्पस संचालक समितिका अध्यक्ष बजिरमान श्रेष्ठको अध्यक्षतामा भएको कार्यक्रममा प्रा.तारा बराल, भद्रकाली मावि व्यवस्थापन समिति अध्यक्ष लोकबहादुर कार्की, सिनेटर रामगोपाल ढेवाजु, पोखरा उद्योग वाणिज्य संघका वरिष्ठ उपाध्यक्ष गोकर्ण कार्की, भद्रकाली बहुमुखी क्याम्पसका प्रमुख नवराज रेग्मी, भद्रकाली माविका प्रअ राजेन्द्र भण्डारी, भद्रकाली बहुमुखी क्याम्पस प्राध्यापक संघका सभापति लोकचन्द्र खनाल, सत्यदेवी आमा समूूह अध्यक्ष जमुनादेवी श्रेष्ठ लगायतले शुभकामना मन्तव्य व्यक्त गरेका थिए ।

कार्यक्रममा क्याम्पस संचालक समितिका सदस्य शरदकान्त सिग्देलले स्वागत र क्याम्पसका सहायक प्रमुख नारायणप्रसाद सापकोटाले साहित्यमय भाकामा कार्यक्रम संचालन गरेका थिए ।
सो अवसरमा वडाध्यक्ष किरण बरालले क्याम्पसको संरक्षक बन्ने घोषण गरे । यस्तै, लामो समय अमेरिका बसेका डा.सन्तोष सापकोटाले टिकटकबाट प्राप्त १ महिनाको आम्दानी बराबरको रकम क्याम्पसमा अक्षयकोष स्थापनामा सहयोगको घोषणा गरे ।