पोखरा । पोखरा महानगर खेलकुद विकास समितिले खेलाडीलाई १० लाख रूपैयाँ बराबरको खेल सामग्री वितरण गरेको छ ।

पोखरा रंगशालामा शुक्रबार आयोजित समारोहमा नगर प्रमुख धनराज आचार्यले विभिन्न खेलसम्बद्ध संघसंस्था, प्रशिक्षक र खेलाडीलाई खेलकुद सामग्री वितरण गरे । बास्केटबल, भलिबल, फुटबल, आइटिएफ तेक्वान्दो, केन्पो काइ, बक्सिङ, मुआ थाइ, उसु, एथलेटिक्स, कराँतेलगायत खेलका संघसंस्था, प्रशिक्षक र खेलाडीलाई खेलकुद सामग्री वितरण गरिएको हो ।

मेयर आचार्यले नवौं राष्ट्रिय खेलकुदमा धेरै पदक जित्ने गरी मिहिनत गर्न प्रशिक्षक र खेलाडीलाई आग्रह गरे । ‘प्रतियोगितामा हुने ३६ खेलमध्ये धेरैभन्दा धेरै खेलमा पदक गण्डकी प्रदेशले ल्याउने गरी मिहिनेत आवश्यक छ,’ उनले हौसला बढाए ।

राष्ट्रिय खेलकुद सफल पार्न स्थानीय आयोजक भएको नाताले पोखरासँगै प्रदेशका खेल संघ र खेलाडी लाग्नुपर्ने उनले बताए ।

थोरै बजेट भए पनि सके जति खेललाई सामग्री बाँडेर सम्बोधन गर्ने प्रयास गरेको खेलकुद विकास समिति अध्यक्ष दीपकबहादुर गोदारले बताए ।

यसैबीच, महानगर खेलकुद विकास समितिको कार्यालय उद्घाटन गरिएको छ । यसअघि ड्यामसाइडस्थित शिक्षा महाशाखासँगै रहेको कार्यालय रंगशाला सारिएको समितिका सदस्य सचिव सुवास खड्काले बताए ।