पोखरा । पोखरामा हुने माउन्ट एभरेष्ट अन्तर्राष्ट्रिय खुला तेक्वान्दोमा १ हजार ३ सय जना खेलाडीहरु सहभागी हुने भएका छन् ।

‘तेस्रो माउन्ट एभरेष्ट अन्तर्राष्ट्रिय खुला तेक्वान्दो च्याम्पियनसिप–२०२२’ जि–२ र्‍याकिङ तथा ‘प्रथम जिसिएस माउन्ट एभरेष्ट अन्तर्राष्ट्रिय खुला पुम्से च्याम्पियनसिप–२०२२’ मा कुल १३ देशका १ हजार ३ सय खेलाडीले भाग लिने पत्रकार सम्मेलनमा जनाइएको छ ।

आगामी असोज ६ देखि ९ सम्म हुने र्‍याकिङतर्फ १ हजार १ जना र पुम्सेतर्फ २ सय ९८ जना खेलाडीहरुले आफ्नो नाम दर्ता गराएको गण्डकी प्रदेश तेक्वान्दो संघका अध्यक्ष जगनबहादुर गुरुङले बताए । दक्षिण एशियामा नै पहिलो पटक उक्त प्रतियोगिता नेपालमा आयोजना गर्न पाउनु गौरवको विषय रहेको बताउँदै उनले ग्योरोगी र्‍याकिङ जुनियर तथा सिनियर र पुम्से प्रतियोगिताका लागि खेलाडीहरुको दर्ता हिजो विहिबार बाटै रोकिएको बताए । पोखरा रंगशालामा खेलाडीहरुको लागि आवश्यक पर्ने एरिना सानो र थोरै दर्शक क्षमता भएकोले दर्ता ४ दिन अघि नै स्थगित गर्नु परेको उनले जनाए । कोभिड १९ का कारण समस्यामा रहेको पर्यटन क्षेत्रलाई यो खेलले प्रवद्र्धन गर्न सहयोग पुग्ने उनको दाबी छ ।

प्रतियोगितामा विश्वभरीका खेलाडी, निर्णायक, प्रशिक्षक, सहभागी खेलाडीका परिवारका सदस्य र तेक्वान्दो महासंघका विशिष्ट पदाधिकारीसहित २ हजारभन्दा बढीको सहभागीता हुने संघका केन्द्रीय महासचिव दीपराज गुरुङले बताए । प्रतियोगिता सम्पन्न गर्न २ करोड ५५ लाख खर्च हुने संघ गण्डकी सचिव रमेश पौडेलले जनाए ।