हेमजा, २४ साउन । कास्कीको ढिकुरपोखरीमा यस वर्ष तीजमेला हुने भएको छ । अन्नपूर्ण गाउँपालिका वडा १, २, ३ स्थित ढिकुरपोखरी युवा सञ्जालको आयोजनामा सो मेला हुने भएको हो । मेला अवसरमा ११ ए साइड फुटबल प्रतियोगिता, तीजगीत प्रतियोगिता, रस्साकस्सी, घैटोफुटाई लगायत प्रतियोगिता गर्न लागिएको संजाल महासचिव दिलबहादुर जिसीले जानकारी दिए ।

मंगलवार युवा भेलामा नवीन गिरी संयोजक तथा किरण गुरुङ सहसंयोजक रहेको ३१ सदस्यीय मूल आयोजक समिति गठन गरियो ।

यसअघि मेला संचालन सम्बन्धमा गाउँपालिका, माछापुच्छे मावि, युवा संजालका प्रतिनिधि तथा मैदान निर्माणको ठेकेदार पक्ष् बीच छलफल पनि भएको छ । जसअनुसार ठेकेदार सुदीप बुढामगरले साउन ३० भित्र मैदान पूर्ववतः अवस्थामा फर्काइ खेल्न योग्य बनाउने सहमति भएको छ ।

ढिकुरपोखरीमा २० औं वर्षदेखि तीजमेला हुँदै आएकोमा कोरोनाका कारण गएको २ वर्ष मेला हुन सकेको थिएन ।