पोखरा । चैत २५ मा एमालेका खगराज अधिकारीलाई प्रदेश प्रमुख डिल्लीराज भट्टले मुख्यमन्त्री नियुक्त गरे । त्यसको पर्सिपल्ट कांग्रेसका सुरेन्द्रराज पाण्डेले अधिकारीको नियुक्ति प्रक्रिया नै गैरसंवैधानिक भएको भन्दै रिट दायर गरे । २८ गते अदालतले कारण देखाउ आदेशका साथमा अधिकारी सरकारलाई दीर्घकालीन महत्वका काम नगर्न भन्यो ।
मुख्यमन्त्री अधिकारीले २७ गतेको मिति राखेर मुख्य न्यायाधिवक्ता लगायतको नियुक्तिका लागि क्याबिनेटबाट निर्णय गराए । जस अनुसार मुख्य न्यायाधिवक्तामा नियुक्त भए लमजुङका कृष्ण अधिकारी । अधिकारीले चैत २९ मा सपथ पनि खाए । अहिले सर्वोच्चमा परेको मुद्दामा उनै अधिकारीले लिखित जवाफ पेस गर्नुका साथै वहस पनि गरेका छन् ।
सपथ लिएर काम थालेको १४ दिन भइसक्दा समेत मुख्य न्यायाधिवक्ता कार्यालयको वेब साइटमा अघिल्लो सरकारकै पालाका मुख्य न्यायाधिवक्ता चिरञ्जीवी शर्मा पाैडेलको फोटो र विवरण छ । कार्यालयले नयाँ मुख्य न्यायाधिवक्ताको फोटो र विवरण ओसिए डट गण्डकी डट जिओभी डट एपीमा राख्न भ्याएको छैन ।

निवर्तमान मुख्य न्यायाधिवक्ता शर्मालाई सुरेन्द्रराज पाण्डेले नियुक्त गरेका हुन् । पाण्डेले राजीनामा दिएपछि शर्माले पनि राजीनामा दिएका थिए । मुख्यमन्त्री खगराज अधिकारीविरुद्ध मुद्दा दायर गर्ने शर्माको नाम मुख्य न्याधिवक्ताको रुपमा अझै वेबसाइटमा छ । सरकार फेरबदलका कारण प्रदेशका सबैजसो कार्यालयको काम ठप्पप्राय छ । अरु काम नभएका बेलामा समेत मुख्यन्यायाधिवक्ताको कार्यालयका कर्मचारीलाई वेबसाइट अपडेट गर्ने फुर्सद नै रहेनछ ।

कृषि तथा भूमि व्यवस्था मन्त्रालयमा पनि हिजोसम्म महेन्द्रध्वज जिसीको नाम रहेकामा आज बल्ल हटाइएको छ ।