पोखरा । पोखरा कलेज अफ म्यानेजमेन्टको २० औं वार्षिकोत्सवको अवसरमा आइतबार वृक्षरोपण गरिएको छ । पोखरा महानगरपालिका वडा नं. ११ काहुँडाँडामा १० प्रजातीका करिब १ सय ५० बिरुवा रोपिएको कलेजका बिबिए कार्यक्रम संयोजक सरोज कुँवरले बताए ।

कलेज व्यवस्थापन समितिका अध्यक्ष विनोद कायस्थ, सञ्चालक प्रान्जल कायस्थ र प्राचार्य लिना नेगी श्रेष्ठले संयुक्त रुपमा कार्यक्रमको उद्घाटन गरे । कार्यक्रममा शिक्षक, कर्मचारी र विद्यार्थीहरुको उल्लेख्य सहभागिता थियो ।

पोखरा विश्वविद्यालयबाट सम्बन्धन प्राप्त गरी २०५८ मा स्थापित यस कलेजले हाल स्नातक तहमा बिबिए र बिसिआइएस (आइटी) कार्यक्रमको अध्यापन गराउँदै आइरहेको छ । यस कलेजबाट हालसम्म ४ हजारभन्दा बढी विद्यार्थीहरुले अध्ययन पूरा गरी उद्योग, बैंक, इन्सुरेन्स, पर्यटन, प्राध्यापन, सूचना प्रविधि कम्पनी लगायतका क्षेत्रमा कार्य गरिरहेको सह प्राचार्य इन्जिनियर हरिप्रसाद बरालले बताए ।