स्याङ्जा । स्याङ्जाको अर्जुनचौपारी गाउँपालिकाले घरघरमै पुगेर ज्येष्ठ नागरिक भत्ता वितरण गर्ने अभियान सुरु गरेको छ । पालिकाका अध्यक्ष प्रकाश तिवारी, उपाध्यक्ष सपना गुरुङलगायत जनप्रतिनिधि वडा न. ६ मा पुगेर सामाजिक सुरक्षा भत्ताबापत पाउने नगद ज्येष्ठ नागरिकको हातहातमा थमाएका हुन् ।
उनीहरूले नगद ८ हजार बुझेका छन् । गाउँपालिकाको अध्यक्ष जितेमा सामाजिक सुरक्षा भत्ता गाउँमा पु¥याउने आफ्नो प्रतिबद्धताअनुसार अभियान सुरु गरेको उहाँले बताउँदै हरेक ३/३ महिनामा सबैका घरमा पुगेर भत्ता वितरण गर्ने बताए ।

स्थानीय तहको निर्वाचन सम्पन्न भएसँगै ज्येष्ठ नागरिकका घरघरमा पुगेर सामाजिक सुरक्षाभत्ता वितरण गर्ने अर्जुन चौपारी गाउँपालिका पहिलो बनेको छ । आफ्नो घरमै आएर भत्ता लिन जाँदा जिप रिजर्भ गरेर जानुपर्ने बाध्यता र झन्झट हटेकोमा ९८ वर्षीया मोतीलाल तिवारी र ७२ वर्षीय थमकुमारी पौडेललगायत ज्येष्ठ नागरिकहरु खुसी भएका छन् ।

गाउँपालिकामा १ हजार २ सय ५१ जना ७० वर्ष माथिका छन् भने २ हजार ५ सय २३ जनाले विभिन्न क्षेत्रका सामाजिक सुरक्षा भत्ता बुझ्दै आएका छन् ।
सरकारले यसैवर्षदेखि वृद्धभत्ता पाउने उमेर ७० बाट ६८ वर्षमा झारेको छ । यसअघि ७० वर्ष पुग्नु प्रावधान रहे तापनि अबदेखि भने ६८ वर्षमै ज्येष्ठ नागरिक भत्ता बुझ्न पाउने भएका छन् ।

अर्जुनचौपारी गाउँपालिकाले मुक्तिनाथ विकास बैकसगँको सहकार्य र समन्वयमा पहिलो पटक गाउँमै पुगेर सामाजिक सुरक्षा भत्ता वितरण गरेको हो । सरकारले ज्येष्ठ, विपन्न, अशक्त असहाय, एकल महिला, अपांगता भएका व्यक्ति, दलित बालबालिकालाई भत्ता उपलब्ध गराउँदै आएको छ ।

यसैगरी आफ्नो हेरचाह आफैं गर्न नसक्ने, लोपोन्मुख जातिका व्यक्ति, गम्भीर रोग लागेकाहरुको उपचारका लागि भत्ता तथा उपचार खर्च पनि वितरण गर्दै आएको छ ।