पोखरा । जनएकता युवा क्लबको आयोजनामा शनिबारदेखि क्लबस्तरीय प्रथम सेभेन ए साइड फुटबल प्रतियोगिता सुरु भएको छ ।

पोखरा–१४ स्थित रामेश्वरी माविको खेलमैदानमा भएको प्रतिस्पर्धामा शनिबारको पहिलो खेलमै आयोजक स्तब्ध बन्न पुगेको छ । जनएकता क्लब उद्घाटन खेलमा स्थानीय मेरो नेपाल युवा क्लबसँग ३–२ गोलअन्तरले पराजित हुन पुग्यो । जनएकताका लागि सविन गुरुङ र रोशन न्यौपानेले गोल गरेका थिए । मेरो नेपालको लागि विनय सुनार, विनय थापा र अर्जुन खत्रीले गोल गरेका थिए ।

प्रतियोगिताको गण्डकी खेलकुद परिषदका सदस्य सचिव तेजबहादुर गुरुङले उद्घाटन गरे । ४६ क्लबको सहभागिता रहेको प्रतियोगिता विजेताले १ लाख ११ हजार र उपविजेताले ६१ हजार १ सय रुपैयाँ प्राप्त गर्ने छन् ।

उत्कृष्ट खेलाडीले ५ हजार तथा उत्कृष्ट गोलकिपर, सर्वाधिक गोलकर्तालाई जनही ३ हजार रुपैयाँ प्रदान गरिने छ । क्लब अध्यक्ष बेववृजन खड्काको अध्यक्षतामा भएको उद्घाटन समारोहमा सचिव घनश्याम अधिकारी (श्याम) ले कार्यक्रम सञ्चालन गरेका थिए ।