पोखरा । कोरोना महामारीको प्रभावका कारण तेस्रो लोककवि अलिमियाँ स्मृति खुला सेभेन ए साइड फुटबल प्रतियोगिता स्थगित भएको छ।

आयोजक नेपाल मुस्लिम युवा समितिले आगामी माघ ८ देखि १५ सम्म आयोजनाको तयारी गरेको सो प्रतियोगिता कोरोनाको तेस्रो भेरियन्टको प्रभावका कारण स्थगित गर्ने निर्णय गरेको हो । साथै २० औं आहारारा गोल्डकपका कारण आफ्नो प्रतियोगितामा असर पर्न सक्ने कारण पनि औंल्याइएको छ । सहारा क्लब पोखराले माघ ६ देखि पोखरा रंगशालामा फुटबल प्रतियोगिता गर्दैछ। आहारारा भने स्वास्थ्य सुरक्षा मापदण्ड अपनाएर जसरी पनि गर्ने तयारीमा आयोजक लागिपरेको छ। हालसम्म सो प्रतियोगिता भने स्थगित गर्ने निर्णय आइसकेको छैन।

जिल्ला प्रशासन कार्यालय कास्कीले माघ १ देखि लागु हुने गरी २५ जनाभन्दा बढी मानिस भेला हुने गरी कुनै पनि प्रकारको मेला, महोत्सवल, सभा समारोह गर्न निषेधाज्ञा जारी गरेको छ।

समिति उपाध्यक्ष एवं प्रतियोगिता संयोजक अब्बु बकर मियाँले तेस्रो संस्करणको सो प्रतियोगिता अर्को सूचना नआएसम्म स्थगित भएको र हालसम्म सघाउ पुर्याउने सम्पूर्णमा आभार व्यक्त गरेका छन्।