पोखरा । बगर भाइखलकको आयोजनामा पोखरामा एट ‘ए’ साइड भेट्रान्स फुटबल प्रतियोगिता हुने भएको छ । पोखराको टुँडिखेल मैदानमा पुस २६ देखि १ सम्म रन्जित गुरुङ स्मृति ११ औं संस्करणको बगर बगर भाइखलक एट ‘ए’ साइड अन्तर्राष्ट्रिय फुटबल प्रतियोगिता हुन लागेको हो ।
प्रतियोगितामा देशका विभिन्न सहरका गरी २६ टिमका सहभागिता रहने बिहीबार आयोजित पत्रकार सम्मेलनमा जनाइयो । ४० वर्षभन्दा माथिका खेलाडीले सहभागिता जनाउन पाउने प्रतियोगितामा विजेताले १ लाख ५१ हजार १ सय ११ रुपैयाँ प्राप्त गर्ने छ । उपविजेताले ७५ हजार ५ सय ५५ रुपैयाँ प्राप्त गर्ने संस्थाका महासचिव यामबहादुर गुरुङले जानकारी दिए ।
यसैबीच, संस्थाले पूर्व राष्ट्रिय खेलाडी तथा शिक्षाविद् महेश गुरुङलाई उद्घाटन समारोहमा सम्मान गर्ने भएको छ ।

युवापुस्तालाई फुटबलप्रति रुचि जगाउने अभिप्रायले बगर भाइखलबले वर्षेनी एट ए साइड फुटबल प्रतियोगिता गर्दै आएको छ

प्रतियोगितामा विधागतरुपमा उत्कृष्ट गोलकिपर, डिफेन्डर, मिडफिल्डर, फरवार्डलई ट्रफीसहित ५ हजार रुपैयाँ प्रदान गरिनेछ भने सर्वोत्कृष्ट खेलाडीलाई १० र ट्रफी प्रदान गरिनेछ । सेमिफाइनलिस्ट २ टिमले १०/१० हजार पाउने छन् ।
प्रतियोगिता गर्न २० लाख रुपैयाँ खर्च हुने अनुमान गरिएको संस्था अध्यक्ष दिलबहादुर गुरुङले बताए । बढ्दो उमेरसँगै स्वास्थ्यप्रतिको सचेतना बढाउँदै युवापुस्तालाई फुटबलप्रति अभिप्रेरित गराउने अभिप्रायले बगर भाइखलबले वर्षेनी एट ए साइड फुटबल प्रतियोगिता आयोजना गर्दै आएको छ । ४० देखि ६५ वर्ष उमेर समूहका पाका खेलाडीको खेलबाट नयाँ पिढीलाई खेलकुदमा अभिरुची जगाई भविष्यमा खेलाडी उत्पादन गर्ने लक्ष्य राखिएको अध्यक्ष गुरुङले बताए ।
प्रतियोगितालाई स्व. रन्जित गुरुङको परिवारले सातौं संस्करणदेखि निरन्तर मुख्य प्रायोजन गर्दै आइरहेको छ । त्यस्तै बगर भाइ खलक युकेबाट मेडल र ट्रफी सौजन्य हुने गरेको छ । पत्रकार सम्मेलनमा प्रदेश खेलकुद परिषद्, गण्डकीका सदस्य सचिव तेजबहादुर गुरुङ, संस्थाका प्रमुख सल्लाहकार दिनेशकुमार श्रेष्ठ र सल्लाहकारद्वय जयराम हमाललगायत उपस्थित थिए ।
१० औं संस्करणको उपाधि मिया सान मिया एफसी वार्यन फेन क्लब नेपाल, काठमाडौंले जितेको थियो ।