पोखरा । नेपाली कांग्रेस मुस्ताङको जिल्ला कार्यसमिति सभापतिमा पूर्ववाणिज्य मन्त्री तथा संविधान सभा सदस्य रोमी गौचन थकाली सर्वसम्मत निर्वाचित भएका छन् । मुस्ताङको थासाङ गाउँपालिका–३ लेते कालोपानीमा शुक्रबार भएको पार्टीको जिल्ला अधिवेशनले पूर्व मन्त्री थकालीलाई सभापति पदमा सर्वसम्मत निर्वाचित गरेको हो ।
मुस्ताङको ५ वटै स्थानीय तहमा चुनिएका क्षेत्रीय प्रतिनिधि र क्रियाशील सदस्यहरुको सहमतिमा २३ सदस्यीय मुस्ताङ जिल्ला कार्यसमिति सर्वसम्मत चयन भएको हो । अधिवेशनले उपसभापतिमा विजय हिराचन, महिला उपसभापतिमा ढोका गुरुङ, सचिवमा विकल शेरचन, छेवाङ नर्बु गुरुङ, सहसचिव नम्डुल गुरुङ र सोमल हिराचन र कोषाध्यक्षमा गणेश शेरचनलाइै चयन गरेको छ । अधिवेशनले १५ जना कार्यसमिति समेत निर्विरोध निर्वाचित गरेको उनले बताए ।
यसअघि असोज ९ गते भएको कांग्रेसको पालिकास्तरीय निर्वाचनमा सभापति, उपसभापति, सचिव, सहसचिव र कोषाध्यक्षसहित ५ वटै स्थानीय तहमा १ सय ५८ जना कार्यसमिति निर्विरोध निर्वाचित भएका थिए । यस्तै, वडास्तरमा समेत सर्वसम्मत क्षेत्रिय प्रतिनिधि र क्रियाशिल सदस्य चयन गरिएको थियो। योसँगै मुस्ताङमा कांग्रेसले विवादरहित ढंगले सबै जिल्ला तहको निर्वाचन सम्पन्न गरेको शिक्षक मुस्ताङका अध्यक्ष आचार्यले जानकारी दिए ।