पोखरा । नेसनल फुटसल लिग खेल्ने पोखरेली टिम स्पोर्टस् क्यासललाई अंशुभरा गु्रपले साथ दिने भएको छ । अटोमोबाइल, रियलस्टेट, हस्पिटालिटी, मोंक, तथा वित्तीय क्षेत्रमा कार्यरत अंशुभरा गु्रपले फुटसल लिगसँगै १ वर्षको लागि स्पोर्टस् क्यासलको फुटसल टोलीलाई आर्थिक तथा भौतिक (आपसी समझदारीमा) सहयोगसहित सम्झौता गरेको हो ।
पोखरामा आइतबार आयोजित कार्यक्रमबीच क्यासलका तर्फबाट सञ्चालक ईश्वर गुरुङले र अंशुभरा गु्रपको तर्फबाट प्रबन्धक निर्देशक सौगात थापाले सम्झौता पत्रमा हस्ताक्षर गरे ।
कार्यक्रममा निर्देशक थापाले आफ्नो गु्रपको मान्यताअनुरुप सामाजिक उत्तरदायित्वको जिम्मेवारी बोध गर्न खेलकुद संस्थालाई सहयोग गरेको बताए । उनले क्यासलसँग आन्तरिक रुपमा आपसी समझदारी गरेको बताउँदै १ वर्ष अफिसियल्ली साथ दिने बताए । थापाकाअनुसार गु्रपले क्यासललाई आगामी भदौको २६ गतेसम्म साथ दिनेछ ।
क्यासलका सञ्चालक गुरुङले हस्ताक्षरपश्चात् अंशुभराको साथप्रति आभार प्रकट गरे । उनले आफ्नो टोलीले विगत २ महिनादेखि प्रशिक्षण गर्दै आएको बताउँदै प्रतियोगितामा राम्रो रिजल्ट दिने विश्वास व्यक्त गरे ।
युवा समाजसेवी राजन गुरुङले स्पोर्टस् क्यासलले सिंगो गण्डकी प्रदेशको प्रतिनिधित्व गर्ने बताए । उनले खेलकुदको विकासमा राजनीतिक हस्तक्षेप हुन नहुनेसमेत धारणा राखेका थिए ।

खेलाडीको अन्तिम छनोट सोमबार
विगत २ महिनादेखि बन्द प्रशिक्षणमा २४ जना खेलाडी छन् । सोमबार कुल १७ जनाको अन्तिम नाम सार्वजनिक गर्ने टिम व्यवस्थापक ओम गुरुङले बताए । उनकाअनुसार क्षितिज गुरुङको कप्तानीमा राष्ट्रिय फुटसल टोलीका पूर्व कप्तान विजय गुरुङ, राष्ट्रिय फुटसल खेलाडी विनोद गुरुङ, सरोज गुरुङलगायतले प्रशिक्षण गरिरहेका छन् । उनीहरुलाई विष्णु गुरुङ र अर्बिन गुरुङले प्रशिक्षण दिइरहेको व्यवस्थापक गुरुङले बताए ।
आगामी २ देखि २२ असोजसम्म पोखरा रंगशालाको कभर्ड हलमा सञ्चालन हुने ए डिभिजन फुटसल लिगमा देशभरबाट कुल १० टिमले प्रतिस्पर्धा गर्नेछन् । प्रदेश १ बाट फुटसल फाइभ धरान, दी राइजिङ क्लब धरान, वागमती प्रदेशबाट ढुकु फुटसल हब, शंखमुल फुटसल, प्रभातफेरी युवा क्लब, र स्काई गोल्स फुटसल क्लबको सहभागिता रहनेछ । यसैगरी गण्डकी प्रदेशबाट स्पोर्टस् क्यासल र सबिन मेमोरियल, लुम्बिनी प्रदेश र सुदूरपश्चिमबाट २ टिमले प्रतिस्पर्धा गर्नेछन् ।
स्पोर्टस् क्यासलले २ असोजमा साढे ४ बजे पहिलो खेल प्रभात फेरी युवा क्लबसँग खेल्नेछ ।
उक्त लिग विजेताले नगद १० लाख प्राप्त गर्नेछ भने उपविजेताले ५ लाखको हकदार बन्नेछ । प्रतियोगितामा विधागततर्फ उत्कृष्ट खेलाडीले जनही २५ हजार प्राप्त गर्ने एन्फाले जनाएको छ ।