पोखरा । लालिगा लिडर एथ्लेटिको मड्रिड रियल मड्रिडसँग बराबरीमा रोकिएको छ । आइतबार भएको दोश्रो मड्रिड डर्बीमा एथ्लेटिकोले अग्रता जोगाउन नसक्दा बराबरी नजिता निकालेको हो ।

खेलको १५ मिनेटमा लुइस स्वारेजको गोलबाट अग्रता कायम गरेको एथ्लेटिकोविरुद्ध ८८ मिनेटमा करिम बेन्जेमाले बराबरी गोल फर्काएका थिए । घरेलु मैदानमा एथ्लेटिकोले जित निकाल्न सकेको अवस्थामा लिगमा स्पष्ट अग्रता कायम राख्न सक्थ्यो । तर, बराबरी डर्बीले भने उपाधि केही रोमान्चक हुने भएको छ ।

६० प्रतिशत आफ्नो पक्षमा बल राखेपनि रियलका लागि बराबरी गोल नै संघर्षपूर्ण बनेको थियो । घरेलु टोली भने अग्रता जोगाउन नसक्दा अंक बाड्न परेको थियो ।

रियल र एथ्लेटिकोले अंक बाड्दा बार्सिलोनालाई भने केही राहत भएको छ । समान २६ खेलमा बार्सिलोनाको ५६ र रियलको ५४ अंक छ । १ खेल कम खेलेको एथ्लेटिकोको भने ५९ अंक छ । ताजा खेल अनुसार एथ्लेटिकोसँग बार्सिलोनाको दूरी घटेको छ भने रियलसँग बढेको छ ।