पोखरा । विधान स्पोर्ट्स हाउस वालिङ स्याङ्जाले स्वर्गीय महेश खड्का स्मृति कप क्लब स्तरीय महिला तथा पुरुष भलिबल प्रतियोगिताको उपाधि जितेको छ ।

आइतबार भएको फाइनलमा विधान स्पोर्ट्स हाउस वालिङ स्याङ्जाले गल्कोट बागलुङलाई ३–० को सोझो सेटमा पराजित गर्दै उपाधि जितेको हो ।

एकपक्षीय खेलमा विधान स्पोर्ट्सले २५–२०, २५–१८ र २५–२२ को सहज जित निकाल्दै विधान स्पोर्ट्स हाउस पुरुषतर्फ च्याम्पियन बनेको हो । शनिबार भएको फाइनल खेलमा चौथो सेट चलिरहँदा वर्षाका कारण खेल रोकिएपछि आइतबार फाइनल खेल भएको आयोजक युनाइटेड पोखरा क्लब कास्कीका अध्यक्ष अनिल गुरुङले जानकारी दिए । शनिबार भएको खेलमा गल्कोट बाग्लुङले २ तथा विधान स्पोर्ट्स हाउसले १ सेट जितेको थियो । चौथाें सेटमा चल्दै गर्दा वर्षा भएपछि फाइनल खेल आइतबार सुरुबाटै खेलाइएको हो ।

शनिबार भएको महिलातर्फ फाइनल खेलमा यजु युथ क्लबलाई हराउँदै अर्चलबोट विजेता बनेको छ । ३–० को सोझो सेटले अर्चलबोटले यजु युथ क्लबलाई पराजित गर्दै उपाधि जित्न सफलको थियो । पुरुष तर्फ विजेता बनेको विधान स्पोर्ट्सले ८० हजार रुपैयाँ सहित शिल्ड मेडल र प्रमाणपत्र प्राप्त गरे । दोस्रो भएको गल्कोट बागलुङले ५० हजार हातमा चित्त बुझाउनुप¥यो । महिलाको विजेता अर्चलबोटले २५ हजार र उपविजेता यजु युथ क्लबले १५ हजार रुपैयाँ सहित शिल्ड मेडल र प्रमाणपत्र प्राप्त गरे ।

तियोगितामा विधानका घनश्याम चौधरी पुरुषतर्फ सर्वाेत्कृष्ट खेलाडी घोषित भए । उनले नगद २ हजारसहित ट्रफी प्राप्त गरे । उनी प्रतियोगिताको उत्कृष्ट सर्भर समेत चुनिए । विधानकै रवी सेन्चुरी उत्कृष्ट स्पाइकर, सुजन चोखाल उत्कृष्ट सेटर तथा पारसमान गुरुङ उत्कृष्ट डिफेन्डर घोषित भए । गल्कोटका राजु विक उत्कृष्ट क्विकर तथा गल्कोटकै दीपक मल्ल उत्कृष्ट ब्लकर चुनिए । विधागत रुपमा उत्कृष्टलाई ट्रफी प्रदान गरिएको थियो ।

महिलामा अर्चलबोटकी मनिषा तिलिजा सर्वाेत्कृष्ट खेलाडी बनिन् । उनले नगद १ हजार सहित ट्रफि हात पारिन् । यस्तै सनिशा राना उत्कृष्ट स्पाइकर, मिया पुन उत्कृष्ट सेटर, एसिला रोका उत्कृष्ट सर्भर र लक्ष्मी राना उत्कृष्ट डिफेन्डर चुनिए ।

विजेता खेलाडीलाई पश्चिमाञ्चल क्षेत्रीय खेलकुद विकास समिति उपाध्यक्ष नवीनकुमार गुरुङ र स्वर्गीय महेश खड्काका पिता तुलबहादुर खड्काले पुरस्कार वितरण गरेका थिए । फागुन १२ देखि १५ फागुनसम्म पोखरा रंगशालास्थित भलिबल कोर्टमा भएको प्रतियोगितामा पुरुषतर्फ १४ तथा महिलामा ६ टोलीको सहभागिता थियो ।

प्रतियोगिताबाट बचत भएको रकमबाट स्व. महेश खड्काका परिवारलाई नगद २० हजार रुपैयाँ सहयोग गरिएको थियो । क्लबका अध्यक्ष गुरुङले छिट्टै आयव्यय सार्वजनिक गरि बचत भएको रकमबाट केही छुट्याएर वृद्धाश्रम सहयोग गर्ने निर्णय भएको बताए ।