हेमजा, ५ फागुन। अन्नपूर्ण गाउँपालिकाका व्यावसायिक कुखुरापालक किसानलाई तालिम दिइएको छ ।

गाउँपालिकास्थित पशु सेवा शाखाको आयोजनामा ३ दिनसम्म आयोजित तालिममा पशुपन्छी रोग अन्वेषण प्रयोगशाला पोखराका वरिष्ठ पशु चिकित्सक डा केदारराज पाण्डेले सहजीकरण गरेका थिए।

त्यस अवसरमा खोर व्यवस्थापन, जैविक सुरक्षा, रोगको रोकथाम र उपचार, कुखुरामा नियमित दिइने खोप लगायत विषयमा छलफल गरिएको थियो ।

अन्नपूर्ण गाउँपालिका अध्यक्ष युवराज कुँवरले गाउँपालिकाले श्रमको सम्मान गर्ने औँल्याउँदै कृषकलाई मेहनतपूर्वक व्यवसाय सञ्चालन गर्न आग्रह गरे ।

तालिममा सहभागी महेश्वर पौडेल, नवीन गिरी र लक्ष्मी भण्डारीले कुखुरापालनमा सप्लायर्स एवं समयमै चल्ला पाउनमा समस्या भएको बताए ।

सो अवसरमा गाउँपालिका प्रमुख प्रशासकीय अधिकृत युवराज अधिकारी, पशु शाखा प्रमुख ऋषिराम दाहालले पनि बोलेका थिए।