पाेखरा । लुइस स्वारेज र डिएगो कोस्टाको गोलको सहयोगमा एथ्लेटिको मड्रिड विजयी भएको छ । स्पेनिस ला लिगा फुटबल अन्तर्गत शनिबार राति भएको खेलमा एथ्लेटिको मड्रिडले एल्चीलाई ३–१ ले पराजित गरेको हो ।

घरेलु मैदानमा भएको खेलमा एथ्लेटिकोका लागि स्वारेजले ४१ र ५८ औँ मिनेटमा गोल गरे । यस्तै ८० औँ मिनेटमा पाएको पेनाल्टीमा कोस्टाले गोल गरेका हुन् ।

एल्चीका लागि ६४ औँ मिनेटमा बोयेले एक गोल फर्काए । जितपछि शीर्ष स्थानको एथ्लेटिको मड्रिडले दोस्रो स्थानको रियल सोसिडाडसँगको अंक दूरी तीन बनाएको छ । एथ्लेटिकोको १२ खेलबाट २९ अंक भएको छ भने रियल सोसिडाडको १५ खेलबाट २६ अंक भएको छ ।

लेभान्टेसँग २–१ ले पराजित भएर सोसिडाडले अंक बराबरी गर्ने मौका गुमायो । अरु खेलमा भिल्ला रियलले ओसासुनालाई ३–१ ले पराजित गर्दा सेभिल्ला र रियल भालाडोलिडले १–१ को बराबरी खेलेका छन् ।