पोखरा । समाजवादी पार्टीका अध्यक्ष उपेन्द्र यादवले सरकारको गतिविधिले लोकतन्त्र खतरामा परेको दाबी गरेका छन् ।

पूर्व भूमिसुधार तथा व्यवस्था मन्त्री एवम् समाजवादी पार्टीका केन्द्रिय सल्लाहकार भीमप्रसाद गौतमको १३ आंै दिनको पुण्यतिथिमा आयोजित श्रद्धाञ्जली सभामा बोल्दै यादवले सो कुरा बताएका हुन् । उनले भने, ‘विभिन्न संघर्षबाट स्थापित लोकतन्त्र खतरामा पर्दै गयो । सरकारले आफ्ना गतिविधी सच्चाउन आवश्यक छ ।’

उनले आन्दोलनबाट प्राप्त भएको संघीयता, समावेशीता लगायतका उपलब्धि खतरामा पर्न थालेको बताए । यादवले स्व। गौतमको योगदानको चर्चा गदै पार्टीले एक असल नेता गुमाउँदा पीडाबोध भएको सुनाए ।

नेकपाका केन्द्रिय सदस्य रणिद बराल, नेपाली काँग्रेसका रामचन्द्र अधिकारी, बन्दीपुर गाँउपालिकाका अध्यक्ष पूणसिं थापा लगायतले बन्दीपुरको विकासमा गौतमको भुमिका बिर्सनै नसक्ने रहेको चर्चा गरे ।

समाजवादी जनता पार्टीका केन्द्रीय सल्लाहकार स्वर्गीय गौतम बाबुराम भट्टराई प्रधानमन्त्री हुदाँको बखत भूमिसुधार तथा व्यवस्था मन्त्री भएका थिए । तत्कालीन जनमोर्चाबाट राजनैतिक यात्रा प्रारम्भ गरेका उनी उपाध्यक्ष समेत बने ।

नारायणकाजी श्रेष्ठको नेतृत्वमा तत्कालीन माओवादीसँगको एकतापछि उनी माओवादीबाट मन्त्री बने । पछिल्लो समय नयाँ शक्तिहुँदै समाजवादी पार्टीका नेता बनेका उनको राजनैतिक सक्रियता घटे पनि स्थानीयस्तरका विकास निर्माणमा भने निरन्तर क्रियाशील रहे ।

गौतमको निमोनियाका कारण ७३ वर्षको उमेरमा कात्तिक २७ गत बन्दीपुर गाउँपालिका–१ पिप्लेस्थित आफ्नै निवासमा निधन भएको हो ।