इङ्लिस प्रिमियर लिग फुटबल सुरु, सलाहको ह्याट्रिकमा साविक प्रिमियर लिग विजेता लिभरपुलको जित सुरुवात

Avatar आदर्श समाज सम्वाददाता
भाद्र २८, २०७७

तस्बीर साभार : इएनसीए डट कम

पोखरा । महम्मद सलाहको ह्याट्रिकसँगै साविक प्रिमियर लिग विजेता लिभरपुलले यस सिजनको इङ्लिस प्रिमियर लिगमा उत्कृष्ट सुरुवात गरेको छ ।

शनिबार राति प्रिमियर लिग अन्तर्गत भएको पहिलो खेलमा लिभरपुलले सानदार जित निकालेको हो । पहिलो खेलमा उत्कृष्ट सुरुवात गरेसँगै लिभरपुलले ३ अंक बटुलेको छ ।

निकै रोमान्चक बनेको उक्त खेलमा लिभरलपुलले लिड्स युनाइटेडलाई ४–३ गोलले पराजित गरेको हो । खेलमा लिभरपुलका लागि महम्मद सलाहले ह्याट्रिकगरे भने भर्गिल भान डाइकले १ गोल गरे । त्यस्तै, लिड युनाइटेडको तर्फबाट ज्याक ह्यारिसन, प्याट्रिक बामफोर्ट र म्याटयुज क्लिचले १/१ गोल गरे ।

तस्बीर साभार : गोल डट कम

खेलको चौथो मिनेटमै लिभरपुरका सलाहले गोल गरी टिमलाई अग्रता दिलाए । उनले उक्त गोल पेनाल्टीमार्फत गरेका थिए । त्यसपछि खेलको १२ औं मिनेटमा लिड्सका ह्यारिसनले बराबरी गोल गरे ।

त्यसपछि खेलको २० औं मिनेटमा लिभरपुरलका भान डाइकले गोल गरी टिमलाई फेरि अग्रता दिलाए । त्यसपछि खेलको ३० औं मिनेटमा लिड्सका बामफोर्टले पुनः बराबरी गोल गरे । फेरि खेलको ३३ औं मिनेटमा सलाहले व्यक्तिगत दोस्रो गोल गरे ।

त्यसपछि खेलको ६६ औं मिनेटमा लिड्सका क्लिचले बराबरी गोल गरे । खेलको ८८ औं मिनेटमा सलाहले नै पोनाल्टीमार्फत गोल गरी टिमलाई जित दिलाए ।

आर्सनल पनि उत्कृष्ट लयमा

त्यस्तै, प्रिमियर लिग फुटबलमा आर्सनलले उत्कृष्ट लय समातेको छ ।

शनिबार भएको नयाँ सिजनको पहिलो खेलमा आर्सनलले फुलहामलाई ३–० गोलले हराउँदै शानदार जित हात पार्दै उत्कृष्ट लय समातेको हो । आर्सनलले पनि पहिलो खेलमा जित हात पार्दै स्पष्ट ३ अंक आफ्नो नाममा लेखाएको छ ।

तस्बीर साभार : डेली क्यानन डट कम

फुलहामको घरेलु मैदानमा भएको खेलमा आर्सनलका लागि एलेक्जान्ड्रा लाकाजेट, ग्राबियल र पिएर एम्रिक आबुमियाङले १/१ गोल गरे । खेलको नवौं मिनेटमा लाकाजेटको गोलबाट पाहुना पाहुना टोली आर्सनलले अग्रता बनाएको थियो । पहिलो हाफमा १ गोल गरेको आर्सनलले दोस्रो हाफमा थप २ गोल गरेको थियो ।

त्यस्तै, ४९ औँ मिनेटमा ग्राबियलले गोल गर्दै आर्सनलको अग्रता दोब्बर पारे । डिफेन्डर ग्राबियलले आर्सनलका लागि डेब्यू खेलमै गोल गरेका हुन् । त्यस्तै, ५७ औं मिनेटमा कप्तान आबुमियाङले गोल गर्दै आर्सनललाई ३–० को जित दिलाए ।

यस सिजनमा मात्र आर्सनलमा आएको विलियनले ३ असिस्ट गरेका छन् । उनले तीनै गोलका लागि असिस्ट उपलब्ध गराएका थिए । उनी चेल्सीबाट आर्सनल आएका हुन् ।

न्यूक्यासललाई पनि ३ अंक

त्यस्तै, गएराति नै प्रिमियर लिग अन्तर्गत भएको अर्को खेलमा न्युक्यासल युनाइटेडले सानदार जित निकालेको छ ।

जितसँगै न्युक्यासलले लिगमा ३ अंक जोडेको छ । निकै रोमान्चक बनेको उक्त खेलमा न्युक्यासल युनाइटेडले वेष्टह्याम युनाइटेडलाई २–० गोलले पराजित गरेको हो । उक्त खेलको ५६ औं मिनेटमा न्युक्यासलका विल्सनले गोल गरी टिमलाई अग्रता दिलाए ।

तस्बीर साभार : सेन्ट लुइस टुडे डट कम

त्यसपछि, खेलको अन्तिम समयमा न्युक्यासलका हेन्ड्रिकले गोल गरी टिमलाई जित दिलाए । खेल सकिन ३ मिनेट बाकीँ रहदा हेन्ड्रिकले गोल गरेका थिए ।