मराउँचेको विकासमा खबरदारी

Avatar श्रीभद्र पौडेल
भाद्र २५, २०७७

हेमजा । अन्नपूर्ण–३, मराउँचेको विकासमा लागि गाउँवासीले बुधवार गाउँपालिकामा खबरदारी गरेका छन्।

गाउँपालिका अध्यक्ष युवराज कुँवर, प्रमुख प्रशासकीय अधिकृत युवराज अधिकारी, वडा २ का अध्यक्ष चूडामणि अधिकारी तथा शिक्षा अधिकृत बलराम भुगाईँसमक्ष गाउँवासीले खबरदारी गरेका हुन्।

गाउँवासीले मुख्य तया मराउँचे गाउँ पुग्ने सडकको स्तरोन्नतिमा ध्यान दिन आग्रह गरे । गाउँपालिकाले वर्षेनी छुट्टाउने ५ लाख रकम सडकको मर्मतमै सकिएको जनाउँदै गाउँवासीले पक्की सडक निर्माण गर्न पनि बजेट विनियोजन गरिदिन आग्रह गरेका थिए।

जवाफमा गाउँपालिका अध्यक्ष कुँवरले मराउँचेको विकासमा आफू संवेदनशील रहेको जनाउँदै त्यसमा उचित ध्यान दिने भनाइ राखे । गाउँको विकासका लागि गाउँपालिकामा मात्रै भर नपरी प्रदेश र संघ सरकारलाई पनि घच्घचाउनु पर्ने उनको धारणा थियो।

प्रमुख प्रशासकीय अधिकृत अधिकारीले मराउँचे गाउँ वस्तीका हिसाबले सानो भएपनि उत्पादनका हिसावले महत्वपूर्ण रहेको औँल्याए ।

गाउँवासीतर्फबाट सुरज पौडेल, चन्द्रकान्त पौडेल, इन्द्रप्रसाद पौडेल, तिलप्रसाद पौडेल, कृष्ण अधिकारी, गोविन्दप्रसाद पौडेल, भोलानाथ पौडेल, मुक्तिराम पौडेल, डिल्लीराम पौडेल लगायतले भनाई राख्दै गाउँविकासमा ध्यानाकर्षण गराएका थिए।

गाउँलेहरुले विकासको तिर्खा लागेर आफूहरु गाउँपालिका आएको, राजनीतिक हिसाबले पहुँच नपुगेको, तिन वटै सरकारबाट गाउँ उपेक्षित भएको लगायतका गुनासो पनि राखेका थिए।