दमौली । वडाले निर्माण गरेको क्वारेन्टाइन बसेका व्यास–९ का एक युवकमा कोरोना संक्रमण पुष्टि भएसँगै वडा कार्यालय बन्द गरिएको छ ।

वडाध्यक्ष सुरेश थापाले मंगलबार विज्ञप्ति जारी गरी कोरोना त्रासका कारण अनिश्चितकालका लागि वडा कार्यालय बन्द गरिएको जनाएका हुन् ।

थापाका अनुसार केहीअघि विदेशबाट फर्किएका युवकलाई क्वारेन्टाइनमा राखिएको थियो । ती व्यक्ति सहित अर्को व्यक्तिलाई पनि क्वारेन्टाइनमा सँगै राखिएको थियो ।

थापाले भने, “क्वारेन्टाइनमा रहेका एक जनाको पीसीआर रिपोर्ट नेगेटिभ छ भने अर्को व्यक्तिको पोजेटिभ छ । संक्रमितको सम्पर्कमा केही स्थानीयहरु आएको बुझिएको छ ।”

ती व्यक्तिको सम्पर्कमा आएका २८ जना स्थानीयसहित ४० जना जनप्रतिनिधि र स्वास्थ्यकर्मीको स्वाब संकलन गरिएको वडाध्यक्ष थापाले बताए ।

यसअघि कोरोना संक्रमित व्यक्ति समुदायमा आएको विषय सार्वजनिक भएसँगै व्यास १० कार्यालय पनि अनिश्चितकालका लागि बन्द गरिएको थियो ।

त्यसैगरी आँबुखैरेनी गाउँपालिकाका उच्च तहका कर्मचारीलाई पनि कोरोनाको संक्रमण देखिएसगै गाउँपालिकाको कार्यालय र वडा कार्यालयहरु बन्द गरिएको थियो ।