विश्वकर्मा समाजघर उद्घाटन

Avatar आदर्श समाज सम्वाददाता
श्रावण ४, २०७७

पोखरा । पोखरा वडा ३२ स्थित रुपा विश्वकर्मा सेवा समाजको दुईतले समाजघर उद्घाटन गरिएको छ ।

संघीय संसद् तथा पूर्व स्वास्थ्यमन्त्री खगराज अधिकारीले समाजघर उद्घाटन गर्दै जातीय अहंकारले सर्वनास निम्त्याउने बताएका छन् । उनले संविधानले जातीय विभेद नमान्ने भएकोले कसैले पनि संविधान विरोधी काम गर्न नहुने बताए ।

प्रदेश सांसद एवं गण्डकी प्रदेश अर्थ तथा विकास समिति सभापति दीपक कोइरालाले कानूनले मात्रै पनि सबै समस्याको समाधान नभएको बताउँदै समाज परिवर्तनको लागि समाजिक चेतनास्तर पनि माथी उठाउनुपर्नेमा जोड दिए ।

रुपा गाउँपालिकाका अध्यक्ष नवराज ओझाले नवनिर्मित भवन समाजको उन्नती प्रगतिका लागि उपयोग गर्न सुझाव दिँदै आइपर्ने हरेक कार्यमा गाउँपालिका सदैव सहयोग गर्न तत्पर रहेको बताए ।

कार्यक्रममा विश्वकर्मा सेवा समाजका केन्द्रीय अध्यक्ष गणेश बराइलीले पछिल्लो समय दलित समुदायको मुद्दालाई अझै पेचिलो बनाउँदै लैजानुपर्ने आवश्यकता देखिएको बताए ।

पोखरा वडा ३२ का अध्यक्ष अक्कलबहादुर कार्की, समाजका सल्लाहकार ऋषि सुनार, समाजका पूर्वअध्यक्ष गिरबहादुर विश्वकर्मा, कार्यक्रम संयोजक दुर्गाबहादुर सुनार, कलाकार महेश गोदार, सदीक्षा सुनार लगायतले बोलेका थिए ।

समाजका अध्यक्ष राजु सुनारको अध्यक्षतामा सम्पन्न भएको उक्त कार्यक्रममा उपाध्यक्ष लालबहादुर विश्वकर्माले स्वागत गरेका थिए भने सञ्चालन सचिव कृष्ण सुनारले गरेका थिए । भवन ५८ लाख २० हजार लागतमा बनेको हो ।

हाम्रो सुझाव