११ जुनबाट ला लिगा सुचारु हुने

Avatar आदर्श समाज सम्वाददाता
जेठ १७, २०७७

पोखरा । आगामी जुन ११ बाट स्पेनिस ला लिगा पुनः सुचारु हुने भएको छ ।

पहिलो खेलमा रियल बेटिस र सेभियाबीच खेल हुनेछ । लिगमा ९२ खेल बाँकी छन् ।

कोरोना भाइरसको संक्रमणको स्थितिलाई मध्यनजर गर्दै यो सिजन १८/१९ जुलाईमा समाप्त गर्ने आयोजकहरुको तयारी रहेको छ । नयाँ सिजन १२ सेप्टेम्बरबाट हुनेछ ।

कोरोनाभाइरसको संक्रमण फैलिएपछि गत मार्च १२ मा लिग स्थगन गरिएको थियो । स्पेनिस सरकारको खेलकुद विभाग र ला लिगा र स्पेनिस फुटबल फेडरेसनबीच यसबारेमा सम्झौता भएको बीबीसीले उल्लेख गरेको छ ।

ला लिगाका खेलाडीहरुले गत हप्तादेखि धेरैमा १० जनाको समूहमा प्रशिक्षण सुरु गरेका थिए । ला लिगाका अध्यक्ष ह्याभियर टेबासले अब खेलाडीहरुको पूर्ण प्रशिक्षण सुरु गर्ने तयारी रहेको बताए ।

हालसम्मको तालिकाअनुसार बार्सिलोना चरिप्रतिद्वन्द्वी रियल म्याड्रिडभन्दा २ अंकले अगाडि रहेको छ । बिहीबार मात्र प्रिमियर लिग आगामी जुन १७ देखि सुरु हुने निर्णय भएको थियो ।