पोखरा, २३ वैशाख । पत्रकार प्रेम नेपालीलाई मंगलवार प्रहरीले गरेको दुव्र्यवहारप्रति नेपाल पत्रकार महासंघ कास्कीले भत्सना गरेको छ ।

नेपाल पत्रकार महासंघ कास्कीका साधारण सदस्य एवं आवर अल न्यूज डटकमका सम्पादक प्रेम नेपालीलाई जिल्ला प्रहरी कार्यालय कास्कीको गेट बाहिर समाचार संकलनका क्रममा प्रहरी अधिकृतद्वारा दुव्र्यवहार गरिएको महासंघ कास्कीका अध्यक्ष दीपेन्द्र श्रेष्ठद्वारा जारी विज्ञप्तिमा भनिएको छ ।

पोखरा–१६ बाटुलेचौरमा भएको जातीय विभेदको घटनालाई लिएर पीडकलाई पक्राउ नगरेको भन्दै जम्मा भएका पीडित पक्ष, कानूनी व्यवसायी र जनप्रतिनिधिकोबारेमा समाचार संकलनका क्रममा भिडियो खिच्दै गर्दा प्रहरी अधिकृतले नखिच्न भन्दै क्यामेरा खोस्ने प्रयास गर्दै दुव्र्यवहार गरेकोप्रति महासंघले खेद व्यक्त गरेको छ ।

कोरोना संक्रमणको महामारीको बेला अग्रमोर्चामा रहेर आफ्नो जिम्मेवारी निर्वाह गरिरहेका पत्रकारमाथि गरिने यस्ता दुव्र्यवहार आगामी दिनमा नदोहोरियोस् भन्दै पूर्ण प्रेस स्वतन्त्रताको प्रत्याभूति र पत्रकारको भौतिक सुरक्षा प्रति संवेदनशील बन्न प्रहरी प्रशासन सहित सम्पूर्ण सरोकारवालामा अनुरोध गरिएको छ ।