अस्ट्रेलिया आइसीसीको नयाँ टेस्ट र टी–२० वरीयतामा शीर्षस्थानमा उक्लिएको छ ।

अस्ट्रेलिया अन्तराष्ट्रिय क्रिकेट परिषद् आइसीसीले शुक्रबार जारी गरेको नयाँ टेस्ट वरीयतामा अस्ट्रेलियाले भारतलाई पछि पार्दै शीर्षस्थानमा उक्लिएको हो । त्यस्तै, टी–२० मा भने अष्ट्रेलियाले पाकिस्तानलाई पछि पारेको हो ।

नयाँ टेस्ट वरीयताअनुसार अस्ट्रेलिया २६ खेलबाट ३ हजार २८ प्वाइन्ट र १ सय १६ रेटिङका साथ शीर्षस्थानमा छ ।

यस्तै, अस्ट्रेलिया टी–२० आई वरीयताको पनि शीर्षस्थानमा उक्लिन सफल भएको छ । २७ महिनादेखि शीर्षस्थानमा रहेको पाकिस्तानलाई पछि पार्दै अस्ट्रेलिया शीर्षस्थानमा उक्लिएको हो । अस्ट्रेलियाको १९ खेलबाट ५ हजार २ सय ८५ प्वाइन्ट र २ सय ७८ रेटिङ अंक छ ।

नयाँ टेस्टमा २१ खेलबाट १ सय १५ रेटिङका साथ न्युजिल्यान्ड दोस्रो स्थानमा छ । २७ खेलबाट ३ हजार ८५ प्वाइन्टका साथ १ सय १४ रेटिङसहित भारत तेस्रो स्थानमा झरेको छ । भारत सन् २०१६ अक्टोबरपछि पहिलोपटक टेस्ट वरीयताको शीर्षस्थानबाट खस्किएको हो ।

इङ्ल्यान्ड चौथो, श्रीलंका पाँचांै, दक्षिण अफ्रिका छैटौं, पाकिस्तान सातौं, वेस्ट इन्डिज आठौं, अफगानिस्तान नवौं र बंगलादेश १० औं स्थानमा छन् । जिम्बाबे ११ र आयरल्यान्ड अन्तिममा छ ।

एकदिवसीय वरीयतामा इङ्ल्यान्ड पहिलो र भारत दोस्रो स्थानमा रहेका छन् । न्युजिल्यान्ड तेस्रो, दक्षिण अफ्रिका चौथो र अस्ट्रेलिया पाँचौं स्थानमा छ । नेपाल १६ औं स्थानमा यथावत् छ । नेपालभन्दा पछि यूएई १७, नामिबिया १८, अमरिका १९ र पपुवान्युगिनी २० औं स्थानमा छन् ।

टी–२० आई वरीयतामा दोस्रो स्थानमा रहेको इङ्ल्यान्डको १७ खेलमा २ सय ६८ रेटिङ अंक छ । भारत तेस्रो, पाकिस्तान चौथो र दक्षिण अफ्रिका पाँचांै स्थानमा छन् । न्युजिल्यान्ड छैटौं, श्रीलंका सातौं, बंगलादेश आठौं, वेस्ट इन्डिज नवौं र अफगानिस्तान १०औं स्थानमा छ । नेपाल भने १५औं स्थानमा छ । नेपालको २३ खेलमा ४ हजार १ सय ४८ प्वाइन्ट र १ सय ८० रेटिङ अंक रहेको छ ।