बुटवल, १२ वैशाख । सरकारले हालै ल्याएको राजनीतिक दल सम्बन्धी विधेयक फिर्ता लिन र स्वास्थ्य सामग्री खरिदमा भएको अनियमितता छानवीनको माग गर्दै नेपाल विद्यार्थी संघले बुटवलमा विरोध प्रदर्शन गरेको छ ।

लकडाउनकै बीचमा बुटवलको पुष्पलाल चोकमा कालो ब्यानर र प्लेकार्ड सहित नेवि संघले प्रदर्शन गरेको हो । संघका केन्द्रीय उपसभापति मुक्तिराज पौडेल, तरुण दलका क्षेत्रीय सभापति हसन्त लामा, बुटवल उपमहानगर समिति सभापति सुजन पुन र रुपन्देहीका विभिन्न क्याम्पसका नेवि संघका सभापति र नेताहरुले सरकारविरुद्ध नाराबाजी समेत गरेका छन् । सरकारको स्वेच्छाचारिता, भ्रष्टाचार र निरंकुश चरित्रका विरुद्ध कोभिड–१९ को जोखिमलाई ख्याल गर्दै सामाजिक दुरी कायम गरेर विरोध प्रदर्शन गरिएको संघका केन्द्रीय उपसभापति पौडेलले बताए ।

विधेयक फिर्ता र स्वास्थ्य सामग्री खरिदमा अनियमितता छानवीनसंगै कोरोनाबाट जोगिन आम नागरिकलाई स्वास्थ्य सामग्री सर्वसुलभ दरमा उपलब्ध गराउन र लकडाउनको मौकामा भइरहेको कालो बजारी तत्काल रोक्न सरकारललाई दवाव दिन प्रदर्शनमा उत्रिनुपरेको केन्द्रीय उपसभापति पौडेलले बताए । सरकारले माग सम्बोधन नगरे प्रदेश र जिल्ला केन्द्रित आन्दोलनलाई लकडाउनकै बीचमा निरन्तरता दिने उनले बताए । प्रदर्शनमा नेवि संघका जिल्ला नेताहरु छाया पोखरेल,सुरज क्षत्री,अशोक गौतम,रेशम केसी लगायतको सहभागिता थियो । नेवि संघको प्रदर्शनलाई प्रहरीले रोकेको थिएन ।