पोखरा ।  पोखरा महानगरपालिका १२ मा सञ्चालित निशुल्क मन्टेसरी तालिम सकिएको छ । ३ महिना अघिदेखि दैनिक ५ घन्टा सञ्चालन भएको तालिममा पोखरा १२ का विभिन्न क्षेत्रका २४ जना महिलाको सहभागिता थियो ।

समापन कार्यक्रमा गण्डकी प्रदेश सामाजिक विकास तथा स्वास्थ्य मन्त्रालयका सचिव प्रकाश पौडेलले पछिल्लो समय विश्व बजारमा खोजी हुने विषयहरुमा तालिम आवश्यक रहेको बताए । समुदायस्तरमा मन्टेसरी तालिमको माग ज्यादै उच्च रहेकाले आगामी पञ्चवर्षीय योजनामा सिपमूलक तालिमलाई जोड दिँदै सिक्दै कमाउँदै कार्यक्रम समावेश गरिने उनले बताए ।

व्यावसायिक तथा सिप विकास तालिम केन्द्र पोखराले सञ्चालन गरेको तालिम समापन कार्यक्रममा पोखरा १२ का अध्यक्ष सन्तोष बास्तोलाले सिकाइलाई प्रभावकारी बनाउन आग्रह गरे । उनले विद्यार्थीलाई घोकन्ते विद्याभन्दा पनि व्यावहरिक रुपमा सिकाउन सकेमात्र उपलब्धि हुने बताए ।

प्रशिक्षार्थी प्रशंसा गुरुङले आगामी दिनमा तालिममा सिकेका सिपको भरपुर सदुपयोग गर्ने बताइन् । तालिममा सहभागी ६ जनाले रोजगारसमेत पाएको तालिम प्रशिक्षक सीता अधिकारी वाग्लेले जानकारी दिइन् ।