नेपाल र भारतका परराष्ट्र सचिव स्तरीय वार्ता सोमबार काठमाडौंमा बस्यो । बैठकमा नेपाली प्रतिनिधि मण्डलको नेतृत्व परराष्ट्र सचिव भरतराज पौड्यालले गरेका थिए भने भारतीय प्रतिनिधि मण्डलको नेतृत्व त्यहाँका विदेश सचिव विनयमोहन क्वात्राले गरेका थिए । सचिव क्वात्रा यसअघि नेपालका लागि भारतीय राजदूत भएर रहेका थिए । उनलाई नेपालबारे धेरै कुरा जानकारी छ । त्यो थाहा भएकोले उनको कार्यकालमा नेपालका धेरै चाहना र इच्छा पूरा गर्ने अपेक्षा गरिएको थियो । तर नेपालले अपेक्षा गरेअनुसार यो बैठकमा त्यस्तो कुनै संकेत देखिएन । उनको नेपाल बसाइँ बैठकमा भन्दा सरकारी र सरकार बाहिरका नेताहरुलाई भेटघाटमा बढी समय खर्च भएको थियो । उनले राष्ट्रपति विद्यादेवी भण्डारी, प्रधानमन्त्री पुष्पकमल दाहाल, परराष्ट्र मन्त्री डा. विमला राईसँग भेटवार्ता गरेका थिए । उनले अन्य पार्टीका नेताहरुसँग पनि वार्ता गरे ।

परराष्ट्र सचिव स्तरीय वार्तालाई धेरै महत्वपूर्ण मानिन्छ । तर यो वार्तामा त्यस्तो महत्वपूर्ण विषयमा छलफल नै भएन । नेपालले कालापानी, लिपुलेक र लिम्पियाधुरा लगायत सीमा विवादबारे कुरा राख्यो, तर भारतीय पक्षले त्यसको कुनै जवाफ नै दिएन । त्यस्तै नेपालले भैरहवाको गौतम बुद्ध विमानस्थल र पोखराको अन्तर्राष्ट्रिय विमानस्थलका लागि हवाई प्रवेश मार्ग उपलब्ध गराउन आग्रह गर्‍यो । त्यो आग्रहको पनि सकारात्मक जवाफ आएन । भारतले ती विषयमा छलफल नै गर्न नचाहेपछि स्थितिले कोल्टे फेरेको छ । नेपालीहरुले भारतले किन हवाई मार्ग दिन हिचकिचाएको छ भनेर आश्चर्य व्यक्त गरेका छन् । त्यसले परराष्ट्र सचिव स्तरीय यो वार्तालाई उपलब्धि बिनाको वार्ता भन्ने गरिएको छ ।

बैठक परम्परागत विषयमा बढी केन्द्रित रह्यो । बैठकमा व्यापार र पारवहन, ऊर्जा, कृषि, शिक्षा, संस्कृति, स्वास्थ्य, रेलमार्ग, विद्युत प्रसारण लाइन, पुल आदि कनेक्टिभिटीका सम्बन्धमा छलफल भयो । पारवहन सन्धि नवीकरण, व्यापार सन्धिको समीक्षा गरी त्यसको बैठक सकेसम्म छिटो गर्ने सहमति भयो । नेपालबाट विद्युत निर्यात गर्ने विषयमा छलफल भएको पनि बताइएको छ । बैठक एकीकृत सुरक्षा जाँच चौकीमा भएको प्रगतिको समीक्षा गरेर त्यसको प्रगति सन्तोषजनक रहेको जनाइएको छ । डायलासिस मेसिन उपलब्ध गराइदिएकोमा नेपाली पक्षले धन्यवाद दिएको छ । नेपालको लागि हवाई प्रवेश मार्ग सबैभन्दा आवश्यक कुरा भएको छ । नेपाली प्रतिनिधि मण्डलले राखेअनुसार हवाई प्रवेशमार्ग छिटो उपलब्ध गराई सहयोग गर्न हामी जोड दिन चाहन्छौं ।